الماتى ءدارىحانالارىنا شىلدە ايىنىڭ باسىنان بەرى قاراي جارتى ميلليونعا جۋىق الەۋمەتتىك ماڭىزى بار دارىلەر الىندى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

الماتى اكىمدىگىنىڭ قالانى دارى-دارمەكتەرمەن قامتاماسىز ەتۋ جونىندەگى ۇيلەستىرۋشىسى زاڭعار سالىمبايەۆتىڭ ايتۋىنشا، شىلدە ايىنىڭ سوڭىنا دەيىن مەگاپوليسكە ءۇش ميلليوننان استام ومىرلىك ماڭىزدى دارى-دارمەك جەتكىزىلەدى.

سالىمبايەۆتىڭ ايتۋىنشا، شامادان تىس سۇرانىس ءدارى تاپشىلىعىنا اكەلدى. ماسەلەن، ەگەر وتكەن جىلى الماتىداعى فارماسيەۆتتەر وتكەن ايدا شامامەن 50 مىڭ قاپتاما پاراسەتامول ساتسا، بيىل وتكەن اپتادا 260 مىڭ قاپتاما قىزۋدى تۇسىرەتىن دارىلەر ساتىلدى. ماسەلەنى شەشۋ ءۇشىن الماتى قالاسىنىڭ اكىمى ب. ساعىنتايەۆتىڭ تاپسىرماسىمەن وندىرۋشىلەرمەن، جەتكىزۋشىلەرمەن، ءدارىحانالار جەلىسىمەن جانە مامانداندىرىلعان قاۋىمداستىقپەن مەموراندۋمعا قول قويىلدى.

«22 ماۋسىمنان باستاپ ءبىز ءىرى جەتكىزۋشىلەرمەن، وتاندىق وندىرۋشىلەرمەن، ديستريبيۋتورلارمەن، ءدارىحانالار جەلىسىمەن جانە فارماسيەۆتيكالىق كومپانيالارمەن بەلسەندى جۇمىس جاساۋدامىز. ولار كەلىسىمگە قول قويدى، وندا ءىرى جەتكىزۋشىلەر، رەسمي ديستريبيۋتورلار الماتى قالاسىنداعى 105 ءدارىحاناعا الەۋمەتتىك ماڭىزى بار دارى-دارمەكتەردىڭ باسىم بولىگىن جەتكىزەتىن بولادى»، — دەپ ءتۇسىندىردى ز. سالىمبايەۆ.

جاعداي الماتى اكىمىنىڭ ۇنەمى قاداعالاۋىندا. فارماسيەۆتيكالىق نارىق قاتىسۋشىلارى دارى-دارمەكتەر قورى تۋرالى جانە اكىمدىك شەشۋگە كومەكتەسىپ جاتقان قيىندىقتار تۋرالى جەدەل تۇردە حابارلاپ وتىرۋدا. اتاپ ايتقاندا، اكىمشىلىك كەدەرگىلەر جويىلىپ، ءبىزدىڭ نارىققا بۇرىن كىرمەگەن يمپورتتالعان دارىلەردى جەدەل سەرتيفيكاتتاۋ شەشىلۋدە.

سالىمبايەۆتىڭ ايتۋىنشا، 1 شىلدەدەن باستاپ قالالىق ءدارىحانالارعا 475 مىڭ ماڭىزدى دارى-دارمەك الىندى. ونىڭ ىشىندە پاراسەتامول، اسپيرين، ينگاۆيرين، ازيتروميسين جانە كارديماگنيل بار.

«شىلدە ايىنىڭ سوڭىنا دەيىن مەگاپوليسكە ءۇش ميلليوننان استام دارى-دارمەك جەتكىزىلەدى. ونىڭ ىشىندە 2،2 ملن تابلەتكا پاراسەتامول، 391 مىڭ اسپيرين، 160 مىڭ يبۋپروفەن، 60 مىڭ ينگاۆيرين، 99 مىڭ ازيتروميسين جانە باسقا دا الەۋمەتتىك ماڭىزى بار دارىلەر. ءۇش رەيس جەتكىزىلەدى دەپ كۇتىلۋدە – ەرتەڭ ۇشاق رەسەيدەن، 12 جانە 15 شىلدەدە ءۇندىستاننان كەلەدى»، — دەپ تولىقتىردى ز. سالىمبايەۆ.

وسىلايشا، دارى-دارمەك نارىعىنداعى جاعداي تولىعىمەن تۇراقتاندىرىلادى.