ۇلىبريتانيالىق Daily Mail باسىلىمى "جۇڭگو جانە ۇلىبريتانيا دەنساۋلىق ساقتاۋ ماماندارى قازاقستاندا تارالىپ جاتقان بەلگىسىز پنيەۆمونيانىڭ ءىس جۇزىندە COVID-19 ەكەنىن ايتتى" دەگەن اقپارات تاراتتى. بۇل تۋرالى قامشى ءتىلشىسى حابارلايدى.
الەمدىك جەتەكشى بۇقارالىق اقپارات قۇرالدارى "قازاقستاندا ءولىم مولشەرى كوروناۆيرۋستان دا جوعارى بەلگىسىز پنيەۆمانيا پايدا بولدى" دەپ جارىسا اقپارات جاريالاعاننان كەيىن، لوندوندا شىعاتىن Daily Mail باسىلىمى قىتايلىق جانە ۇلىبريتانيالىق مەديسينا ماماندارىنان سۇحبات العان.
– بۇگىن كەشتە بەيجىڭدەگى قىتايدىڭ باس ەپيدەميولوگى ۋ سزيۋنيۋ قازاقستاندا تارالعان "بەلگىسىز پنيەۆمونيا" ەپيدەميولوگيالىق تۇرعىدان COVID-19 دەپ سانايتىنىن جەتكىزدى، – دەپ حابارلادى Daily Mail.
باس ەپيدەميولوگ قازاقستان تۋرالى جاڭالىقتاردى بايقاعانىن جانە ينتەرنەتتەن ءتيىستى اقپاراتتاردى وقىعانىن ايتقان.
ول سونىمەن بىرگە قازاقستانداعى "بەلگىسىز پنيەۆمونيادان" بولعان ءولىم-جىتىم دەڭگەيى COVID-19-عا ۇقساس ەكەنىن جەتكىزگەن.
ۇلىبريتانيالىق ماماندار دا قازاقستانداعى جاعدايلاردىڭ انىقتالماعان COVID-19 ينفەكسياسى دەپ سەنەتىنىن جاريالاعان. ۋورۆيك ۋنيۆەرسيتەتىنىڭ ۆيرۋسولوگى جانە ونكولوگى پروفەسسور لوۋرەنس يانگ MailOnline-عا سۇحبات بەرىپ، ولىمگە اكەلەتىن "بەلگىسىز پنيەۆمونيانىڭ" COVID-19-عا قاتىسى جوقتىعىنا سەنۋ قيىن ەكەنىن مالىمدەگەن.
بۇعان دەيىن قازاقستاندىق نەيروحيرۋرگ دارىگەر مىڭجىلقى بەردىقوجايەۆ "پنيەۆمونيادان قايتىس بولىپ جاتقان ادامداردىڭ 99 پايىزىنىڭ ولىمىنە كوروناۆيرۋس سەبەپ" دەپ سانايتىنىن ايتقان.
جۇما كۇنى دۇنيەجۇزىلىك دەنساۋلىق ساقتاۋ ۇيىمى قازاقستانداعى "بەلگىسىز پنيەۆمونيانى" ءىس جۇزىندە انىقتالماعان COVID-19 دەپ مالىمدەگەن.
ال قازاقستاننىڭ دەنساۋلىق ساقتاۋ ءمينيسترى الەكسەي سوي كەرىسىنشە "2020 جىلى پنيەۆمونيادان 1172 ادام قايتىس بولدى" دەپ مالىمدەگەن. الەكسەي سوي كەلتىرگەن دەرەككە ساي، پنيەۆمونيادان قايتىس بولعاندار كوروناۆيرۋس ولىمىنەن بەس ەسەگە كوپ، سەبەبى رەسمي ستاتيستيكا بويىنشا قازىرگە دەيىن قازاقستاندا COVID-19-دان كوز جۇمعاندار سانى 264.
وعان قوسا، 3 شىلدە كۇنى ق ر باس سانيتار دارىگەرى ايجان ەسماعامبەتوۆا 2020 جىلدىڭ العاشقى التى ايىندا 1772 ادامنىڭ، ماۋسىمدا 628 ادامنىڭ پنيەۆمونيادان قايتىس بولعانىن ايتقان. بۇل ەسەپ بويىنشا، پنيەۆمونيادان كوز جۇمعاندار COVID-19-دان قازا تاپقانداردان 7 ەسە كوپ.
وسى دەرەكتەرگە بايلانىستى، ياعني رەسمي ستاتيستيكالار بويىنشا، پنيەۆمونيا ءولىم-جىتىم مولشەرى COVID-19-دان كوز جۇمعانداردان بەس ەسە، ءتىپتى، جەتى ەسەگە دەيىن كوپ بولۋىنا بايلانىستى شەتەلدىك ءىرى باق-تار "قازاقستاندا ءولىم مولشەرى كوروناۆيرۋستان دا جوعارى، ءقاۋىپتى ۆيرۋس تاراپ جاتىر" دەگەن اقپاراتتى جارىسا تاراتتى. ءتىپتى، كەيبىر ەلدەر ازاماتتارىنا قازاقستاننان ابايلاۋ تۋرالى ەسكەرتۋلەر جاساعان.
پىكىر قالدىرۋ