دۇنيەجۇزىلىك بانك قازاقستانعا 2021-2025 جىلدارعا ارنالعان مال شارۋاشىلىعىنىڭ تۇراقتى دامۋ جوباسىن ىسكە اسىرۋعا 500 ميلليون دوللار (459،8 ميلليون ەۋرو) نەسيە بەرۋگە نيەتتى. نەسيەنى ۇكىمەت اتىنان قارجى مينيسترلىگى الماق.
اۋىل شارۋاشىلىعى مينيسترلىگىنىڭ باسپا ءسوز قىزمەتى 500 ملن دوللار كەزەڭ-كەزەڭمەن جانە مال شارۋاشىلىعىن تۇراقتى دامىتۋ جوباسىن ىسكە اسىرۋدىڭ ناقتى ناتيجەلەرىنە قول جەتكىزىلگەننەن كەيىن عانا بەرىلەتىنىن حابارلادى.
"دۇنيەجۇزىلىك بانك جوباسىنىڭ نەگىزگى ماقساتى – ۇلكەن ەكسپورتتىق الەۋەتكە يە ءارى قۇنى جوعارى ەكولوگيالىق تازا سيىر ەتىن ءوندىرۋدى جانە قازاقستاندىق ەت ەكسپورتىن قولداۋ. سول ارقىلى قازاقستان ەكونوميكاسىنىڭ وسۋىنە ىقپال ەتۋ جانە اۋىلدىق جەرلەردە ءومىر ءسۇرۋ جاعدايىن جاقسارتۋ" دەلىنگەن حابارلامادا.
اۋىل شارۋاشىلىعى مينيسترلىگى جوبا اياسىندا تومەندەگىدەي ناتيجەلەرگە قول جەتكىزۋ جوسپارلانعانىن حابارلادى.
- 20 مىڭ فەرمەرگە نەسيە بەرۋ؛
- 100 مىڭ فەرمەرگە ءبىلىم بەرۋ؛
- بالاما ەنەرگيا كوزدەرىن قولدانا وتىرىپ، مال شارۋاشىلىعىنىڭ ينفراقۇرىلىمىن دامىتۋعا فەرمەرلەرگە قارجىلىق قولداۋ؛
- سيىر ەتىن يمپورتتايتىن ەلدەردىڭ تالاپتارىنا سايكەس مال شارۋاشىلىعى ونىمدەرىن باقىلاۋ جۇيەسىن قۇرۋ؛
- جەكە جانە تاجىريبەلىك ۆەتەرينارلاردى شاعىن جانە ورتا فەرمالارعا قىزمەت كورسەتۋگە، سونداي-اق ۆەتەرينارلىق ءىس-شارالارعا تارتۋ.
مينيسترلىك جوبا جوعارىدا اتالعان ءىس-شارالاردى تىكەلەي قارجىلاندىرۋدى كوزدەمەيتىنىن، نەسيە قاراجاتى قازاقستاننىڭ اگروونەركاسىپتىك كەشەنىن دامىتۋدىڭ مەملەكەتتىك باعدارلاماسىن ىسكە اسىرۋدى قولداۋعا جۇمسالاتىنىن مالىمدەدى.
پىكىر قالدىرۋ