نۇر-سۇلتاندا كارانتينگە قاراماستان ويىن-ساۋىق كەشىن وتكىزگەن قالا تۇرعىندارى ۇستالدى. بۇل تۋرالى قالالىق پوليسيا دەپارتامەنتى حابارلادى.
دەپارتامەنت تاراتقان حابارلاماعا قاراعاندا، ءتۇننىڭ ءبىر ۋاقىتىندا شامامەن 50 ادام سارايشىق كوشەسى بويىندا ساۋىق كەشىن وتكىزگەن.
"ءىستىڭ ءمان-جايىن انىقتاۋ ءۇشىن بارلىق قوناقتار پوليسيا بولىمشەسىنە جەتكىزىلدى. تەكسەرۋ ناتيجەسىندە 42 ادام اكىمشىلىك قۇقىق بۇزۋشىلىق كودەكسىنىڭ 441-بابى (جەكەلەگەن قوعامدىق ورىندارىندا تەمەكى ونىمدەرىن جانە ەلەكتروندىق سيگارەتتەردى تۇتىنۋعا تىيىم سالۋدى بۇزۋ)، 437-بابى (تىنىشتىقتى بۇزۋ)، 440-بابى بويىنشا (الكولوگولدىك ىشىمدىكتەردى ءىشۋ نەمەسە قوعامدىق ورىندارعا ماساڭ كۇيىندە كەلۋ)، ال 1 ادام جەكە باستى كۋالاندىراتىن قۇجاتتارسىز تۇرعانى ءۇشىن اكىمشىلىك جاۋاپكەرشىلىككە تارتىلدى
كەشتىڭ ۇيىمداستىرۋشىسى بۇرىن ەلورداداعى ءدامحانالاردىڭ بىرىندە جۇمىس ىستەگەن. جۇمىس ورنى سانيتارلىق-ەپيدەميولوگيالىق نورمالار تالاپتارىنا ساي كەلمەگەندىكتەن جابىلعان. ول وسى كەشتى ۇيىمداستىرۋ ءۇشىن كوتتەدجدى جالعا الىپ، الەۋمەتتىك جەلى ارقىلى كەشتىڭ وتىلەتىنىن حابارلاعان. كوتتەدجدى جالعا الۋشىعا قاتىستى ماتەريال پروسەسسۋالدى شەشىم قابىلداۋ ءۇشىن نۇر-سۇلتان قالاسى بويىنشا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنا جولداندى" دەلىنگەن دەپارتامەنت تاراتقان حابارلامادا.
قازاقستاندا ناۋرىزدان بەرى توي-جيىنعا، ويىن-ساۋىق كەشتەرىنە تىيىم سالىنعان.
پىكىر قالدىرۋ