ورال قالاسىندا ەرەكشە سىرعا سالۋ ءراسىمى ءوتتى. قالىڭدىققا zoom-پلاتفورماسى ارقىلى سىرعا سالىندى. بۇل تۋرالى 24.kz حابارلادى.
– 16 شىلدە كۇنى سىرعا سالۋ ءراسىمى بولاتىن ەدى. 17ء-سى قىز ۇزاتۋ تويى بولۋى كەرەك ەدى. ەندى ونىڭ ءبارىن توقتاتۋعا تۋرا كەلدى. جالپى ەلىمىزدە، دۇنيەجۇزىندە بولىپ جاتقان جاعدايلارعا بايلانىستى. ءبىز ءبىرىنشى ماۋسىمنىڭ 13ء-ى دەپ بەلگىلەگەنبىز. سوسىن ونى 17 شىلدەگە جىلجىتتىق. سوسىن تاعى دوعارۋعا تۋرا كەلدى، – دەدى اكەسى جارىلعاپ دۇيسەنوۆ.
ونىڭ ايتۋىنشا، اۋلاعا كيىز ءۇي تىگىپ، نەمەسە تىعىلىپ توي جاساۋعا بولار ەدى. ءبىراق دۇيسەنوۆتەر وتباسى وندايعا بارماعانىن اتاپ ءوتتى.
سونداي-اق ىندەت ءورشىپ تۇرعان كەزدە بولاشاق قۇدالارى مەن تۋما-تۋىستىڭ دەنساۋلىعىن قاتەرگە تىككىسى كەلمەپتى.
سوندىقتان سىرعا سالۋ، قۇدا ءتۇسۋ ءراسىمىن ونلاين وتكىزۋدى ۇيعارىپتى. اعايىنعا Zoom باعدارلاماسى ارقىلى شاقىرتۋ بەرىلگەن. كوكشەتاۋلىق قۇدالار سىرعا مەن سىي-قادەنى كۋرەر ارقىلى جىبەرىپتى.
– نۇر-سۇلتان، الماتى، كوكشەتاۋ، اۋىلدان تۋما-تۋىسقاندار قوسىلدى، تانىستىق. اسابا ءبارىن مودەراتور بولىپ وتكىزدى. بىزدەر وتە ريزامىز. باستىسى، بالالار بارىپ قوسىلىپ، وقۋىن جالعاستىرسىن. ال بەرگى جاعىندا قۇدالارمەن ارالاسىپ تۇرامىز دەپ كەلىستىك. قوناقتاردى شاقىرۋعا قورىقتىق مىناداي ىندەت بولعاسىن. ماقسات سول عوي، اۋىرماسىن دەپ. ءتىپتى كورشىلەر دە بولعان جوق، – دەدى اناسى نۇرگۇل قازيموۆا.
26 جاستاعى قورلان "نازاربايەۆ ۋنيۆەرسيتەتىنىڭ" حيميا فاكۋلتەتىن بىتىرگەن. كەيىن امەريكاعا وقۋعا تۇسكەن. الايدا پاندەمياعا بايلانىستى ماگيسترلىك دارەجەمەن شەكتەلۋگە تۋرا كەلىپتى. ەندى وڭتۇستىك كورەياعا دوكتورانتۋراعا تاپسىرىپتى. بولاشاق جارى دا وسى ەلدە وقىپ جاتىر.
– ارينە، وسىنداي جاعدايعا تۇسىنۋشىلىكپەن قارادىق. سوندىقتان تويدى وتكىزبەۋدى شەشتىك. ءبىراق مەن تويدى وتكىزبەگەنگە ەشقانداي رەنجىگەن جوقپىن. سەبەبى ۇيلەنۋ تويى بولماسا دا ماديمەن، ارينە، نەكە قيامىز. مەن وڭتۇستىك كورەياعا بارعاسىن 14 كۇن كارانتيندە جاتامىن. وسى ەلشىلىكە بارىپ، ءوتىنىش جازۋ كەرەك. 30 كۇننەن كەيىن بارىپ نەكەمىزدى قيامىز قازاقستاننىڭ ەلشىلىگىندە، – دەدى قالىڭدىق قورلان دۇيسەنوۆا.
14 شىلدەدەن بەرى باتىسقازاقستاندىق ءۇش تۇرعىن كارانتين رەجيمىن بۇزىپ، توي جاساعانى ءۇشىن جاۋاپقا تارتىلعان بولاتىن.
پىكىر قالدىرۋ