كوروناۆيرۋسقا بايلانىستى الەم ەلدەرىنىڭ ستاتيستيكاسىن جاريالاپ وتىراتىن Worldometers.info سايتىنىڭ 18 شىلدەدەگى دەرەگىنشە، دۇنيەجۇزىندە 14،1 ميلليوننان استام ادامعا COVID-19 جۇقتى. ۆيرۋستان ولگەندەر سانى 600 مىڭعا جۋىقتادى. 

ىندەتتەن ەڭ قاتتى زارداپ شەگىپ جاتقان ەل – اقش. ەلدە ۆيرۋس جۇقتىرعاندار سانى 3،7 ميلليوننان اسىپ كەتتى. ولگەندەر سانى 142 مىڭنىڭ ۇستىندە. دۇنيەجۇزى بويىنشا كوروناۆيرۋس جۇقتىرعانداردىڭ تورتتەن ءبىرى وسى ەلدە. اقش حالقىنىڭ سانى 331 ميلليوننىڭ ۇستىندە ەكەنىن ەسكەرسەك، ەل ازاماتتارىنىڭ 1 پايىزدان استامىنا كوروناۆيرۋس جۇققان دەۋگە بولادى. 

الەم ەلدەرىنىڭ اراسىندا جۇقتىرعاندار سانى بويىنشا دا، ءولىم بويىنشا دا ەكىنشى ورىندا تۇرعان – برازياليا. سوڭعى مالىمەتكە ساي، ەلدە 2 ميلليوننان استام ادامنان COVID-19 انىقتالدى. برازيليا – ۆيرۋس جۇقتىرعان ازاماتتارىنىڭ سانى ەكى ميلليوننان اسقان ەكىنشى ەل. اقش سياقتى بۇل ەلدە دە حالقىنىڭ 1 پايىزى ىندەتكە شالدىققان. 

حالقىنىڭ سانى 1،3 ميللياردتان اساتىن ءۇندىستاندا ۆيرۋس جۇقتىرعاندار سانى 1 ميلليوننان استى. ءبىراق بۇل ەلدەگى ستاتيستيكاعا كوپتەگەن حالىقارالىق ۇيىمدار كۇمانمەن قارايدى. ولاردىڭ ويىنشا، ءۇندىستاندا كوروناۆيرۋسقا شالدىققاندار سانى رەسمي ستاتيستكاداعىدان الدەقايدا كوپ بولۋى مۇمكىن. 

كوروناۆيرۋس افريكا ماتەريگىندەگى ەڭ ۇلكەن مەملەكەتتەردىڭ ءبىرى – وڭتۇستىك افريكا رەسپۋبليكاسىندا (وار) دا ءورشىپ تۇر. بۇل ەل ۆيرۋس جۇقتىرعاندار سانى بويىنشا دۇنيەجۇزىندە 6-ورىندا تۇر. ەلدە COVID-19 تابىلعان ادامداردىڭ سانى 337 مىڭنىڭ ۇستىندە. 

وار-دان كەيىنگى ورىندا تۇرعان مەكسيكادا دا ۆيرۋس جۇقتىرعاندار سانى 331 مىڭنان استى. سوڭعى تاۋلىكتە ەلدە 7257 ادامنان كوروناۆيرۋس تابىلعان. دۇنيەجۇزىلىك دەنساۋلىق ساقتاۋ ۇيىمىنىڭ دەرەگىنشە، مەكسيكا كوروناۆيرۋس تەز تارالىپ جاتقان ەلدەردىڭ قاتارىندا. سوڭعى رەسمي اقپاراتقا ساي، ەلدە كوروناۆيرۋستان ولگەندەر سانى 38 310-عا جەتتى. بۇل – الەم بويىنشا ءتورتىنشى كورسەتكىش. 

ددسۇ-نىڭ دەرەگىنشە، كوروناۆيرۋس جىلدام قارقىندا تاراپ جاتقان مەملەكەتتەردىڭ ءبىرى – قازاقستان. سوڭعى رەسمي اقپاراتقا ساي، ەلدە كوروناۆيرۋسقا شالدىققاندار سانى  68 مىڭنان استى. ال ولگەندەر سانى – 375 ادام. قازاقستان ءقازىر ۆيرۋس جۇقتىرعاندار سانى جونىنەن الەم ەلدەرىنىڭ اراسىندا 29-ورىندا تۇر. ءبىراق ەلدەگى ساراپشىلار رەسمي ستاتيستيكاعا كۇمانمەن قارايدى. ويتكەنى ەلدە كوروناۆيرۋسقا شالدىققان ادامداردىڭ ءبىرازىنا پنيەۆمونيا دياگنوزى قويىلعان. كەشە ەل بيلىگى تامىز ايىنان باستاپ كوروناۆيرۋس جانە پنيەۆمونيامەن اۋىرعاندار ءبىر ستاتيستيكاعا بىرىكتىرىلەتىن حابارلادى.