ەڭبەك جانە حالىقتى الەۋمەتتىك قورعاۋ مينيسترلىگى شىلدە ايىندا ازىق-تۇلىك جانە تۇرمىستىق جيىنتىقتار ءۇشىن قاراجات تولەۋدى باستادى. 

قازاقستاندىقتار بيىلعى 20 شىلدەسىنەن باستاپ ايدىڭ سوڭىنا دەيىن بانك كارتالارىنا تولەم الا باستايدى.

بۇيرىق كۇشىنە ەنگەن كەزدە تولەمدى 5 الەۋمەتتىك توپقا جاتاتىن ازاماتتار الادى. جەرگىلىكتى اتقارۋشى ورگاندار قولدا بار دەرەكتەر نەگىزىندە ازىق-تۇلىك جانە تۇرمىستىق جيىنتىق الۋعا ءتيىستى ادامداردىڭ ءتىزىمىن جاسايدى. سودان كەيىن شىلدە ايىنا، ياعني شەكتەۋ شارالارىنىڭ قولدانىلۋ كەزەڭىندە الۋشىلارعا سوماسى 2 اەك مولشەرىندە تولەم جىبەرىلەدى.

5 الەۋمەتتىك توپقا تومەندەگى ساناتقا كىرەتىن ازاماتتار جاتادى:

– اتاۋلى الەۋمەتتىك كومەك الۋشىلار قاتارىنان 6 جاستان 18 جاسقا دەيىنگى بالالار؛

– مەديسينالىق-الەۋمەتتىك مەكەمەلەردە تۇراقتى تۇراتىن مۇگەدەكتەردى قوسپاعاندا، 16 جاسقا دەيىنگى مۇگەدەك بالالار؛

– مەديسينالىق-الەۋمەتتىك مەكەمەلەردە تۇراقتى تۇراتىن مۇگەدەكتەردى قوسپاعاندا، بارلىق جاستاعى I، II، III توپتاعى مۇگەدەكتەر؛

– مۇگەدەك بالا تاربيەلەپ وتىرعان ادامدار؛

– جۇمىسپەن قامتۋ ماسەلەلەرى جونىندەگى جەرگىلىكتى ورگاندا تىركەلگەن جۇمىسسىز ازاماتتار جاتادى.

بۇعان دەيىن حابارلانعانداي، كوروناۆيرۋستىق ينفەكسيانى جۇقتىرۋ ءقاۋپىن ازايتۋ ماقساتىندا ادامداردىڭ تىكەلەي بايلانىسىن بولدىرماۋ ءۇشىن ازىق-تۇلىك جانە تۇرمىستىق جيىنتىقتار 2 اەك-تەن كەم بولمايتىن مولشەردە الۋشىلاردىڭ بانك كارتالارىنا اۋدارىلعان تولەمگە اۋىستىرىلدى.

اعىمداعى جىلدىڭ ناۋرىز ايىنان مامىر ايىنا دەيىن بۇل تولەمدەر جالپى سوماسى 13،5 ملرد تەڭگەگە 1 ملن ادامعا ەسەپتەلگەن.

بۇعان دەيىن قاسىم-جومارت توقايەۆ مۇقتاج جاندارعا ۇكىمەت شىلدە ايىنا 42500 تەڭگە تولەنەتىنىن مالىمدەگەن بولاتىن. 

14 شىلدەدە ق ر پرەمەر-مينيسترى اسقار مامين ۇكىمەت وتىرىسىندا ق ر ەڭبەك جانە حالىقتى الەۋمەتتىك قورعاۋ مينيسترلىگىنە قازاقستاندىقتارعا ازىق-تۇلىك جانە تۇرمىستىق جيىنتىقتار ءۇشىن اقشالاي قاراجات تولەۋدى باستاۋدى تاپسىرعان بولاتىن.