5 شىلدەدەن باستاپ ق ر اكىمشىلىك قۇقىق بۇزۋشىلىق تۋرالى كودەكسىنىڭ 425-بابىنا سايكەس، بەكىتىلگەن سانيتارلىق-ەپيدەميولوگيالىق تالاپتاردى بۇزعان جەكە تۇلعالارعا 83 340 تەڭگە (30 اەك)،  شاعىن كاسىپكەرلىك سۋبەكتىلەرىنە 638 940 تەڭگە (230 اەك)، ورتا كاسىپكەرلىك سۋبەكتىلەرىنە 861 180 تەڭگە (310 اەك)، ءىرى كاسىپكەرلىك سۋبەكتىلەرىنە 4 444 800 تەڭگە (1600 اەك) ايىپپۇل سالىنادى.

ايىپپۇل كىمگە، قالاي سالىنادى؟ كوپشىلىكتى مازالاعان سۇراققا شىعىس قازاقستان وبلىسىنىڭ باس مەملەكەتتىك سانيتاريالىق دارىگەرى مارات يسمايلوۆ كەڭىنەن تولىققاندى ءتۇسىندىرىپ بەردى.

ەگەر دۇكەندە ساتۋشى ماسكاسىز، قولعاپسىز ساتىپ الۋشىلارعا قىزمەت كورسەتسە، جەكە تۇلعاعا 30 اەك ايىپپۇل سالىنىپ، اكىمشىلىك حاتتاما تولتىرىلادى. ال ەگەر كاسىپكەرلىك نىسانىندا مەيلى ول كافە نە دۇكەن بولسىن، ءتيىستى دەزينفەكسيالىق قۇرالدار جوق بولسا، ايىپپۇل نىسان يەسىنە ياعني زاڭدى تۇلعاعا سالىنادى. ايىپپۇل سوماسى كاسىپكەرلىكتىڭ ساناتىنا بايلانىستى، ياعني شاعىن، ورتا نەمەسە ءىرى كاسىپكەرلىكتىڭ ءبىرى بولۋى مۇمكىن.

كوپشىلىك جينالاتىن ورىنداردىڭ ءبىرى – قوعامدىق كولىكتەر. ەگەر جۇرگىزۋشى، كوندۋكتور سانيتارلىق-ەپيدەميولوگيالىق قاۋىپسىزدىك نورمالارىن ۇستانبايتىن بولسا، ايىپپۇل قوعامدىق كولىكتىڭ جۇمىسشىسىنا سالىنادى. ال ەگەر، اۆتوبۋس پاركىنىڭ يەسى سانيتارلىق-ەپيدەميولوگيالىق قاۋىپسىزدىك نورمالارىن ورىنداماعان بولسا، ايىپپۇل اۆتوبۋستاردىڭ يەسىنە، زاڭدى تۇلعاعا سالىناتىن بولادى. بۇل جەردە دە، ايىپپۇل سوماسى كاسىپكەرلىكتىڭ قانداي ساناتتا بولۋىنا بايلانىستى.

جەكە نە زاڭدى تۇلعاعا ايىپپۇل سالىنعان جاعدايدا، تولەيتىن سومانىڭ 50%-ىن عانا تولەۋگە بولاتىن مۇمكىندىك بار.

ءبىرىنشى، (شاعىن، ورتا، ءىرى) كاسىپكەرلىك سۋبەكتىسى انىقتالعان بۇزۋشىلىقتاردىڭ بارلىعىن مويىنداپ، كەلىسۋى قاجەت.

ەكىنشى، ق ر اقبتك 425-بابىنا سايكەس، ايىپپۇلدى العاشقى 7 تاۋلىك ىشىندە تولەيتىن بولسا، بارلىق سومانىڭ 50%-ىن عانا تولەيدى.

سونداي-اق انىقتالعان بۇزۋشىلىقتار سانى سالىناتىن ايىپپۇل مولشەرىنە اسەر ەتپەيدى.

مىسالى، ءبىر دۇكەندە 3 بۇزۋشىلىق انىقتالدى، كەلەسى دۇكەندە 1 عانا بۇزۋشىلىق انىقتالدى. ەكەۋى دە ورتا كاسىپكەرلىك نىساندارى. دۇكەن يەلەرى انىقتالعان بۇزۋشىلىقتار سانىنا قاراماستان، ەكەۋى دە بىردەي 861 180 تەڭگە نەمەسە 310 اەك-تى تولەيتىن بولادى.

شقو تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى كارانتين تالاپتارىن بۇزعاندارعا زاڭ تاراپىنان جاۋاپكەرشىلىك قاراستىرىلعانىن تاعى ءبىر مارتە ەسكەرتەدى.

كوروناۆيرۋس، كارانتين، شەكتەۋ شارالارى كۇندەلىكتى تىرشىلىكتى، جوسپارلانعان شارالاردى وزگەرتكەنى بارشاعا ءمالىم. دەگەنمەن، ءقاۋىپتى ىندەتتى حالىق بولىپ ءبىر كىسىدەي تارتىپكە باعىنىپ، قاجەتتى شارالاردى ورىنداعان كەزدە عانا COVID-19 ۆيرۋسىنىڭ الدىن الىپ، قۇتىلا الامىز.