اسقار جۇماعالييەۆ قازاقستان رەسپۋبليكاسىنىڭ سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى قىزمەتىنەن بوساتىلىپ، ونىڭ ورنىنا ۋاقىتشا پرەزيدەنتىنىڭ سيفرلاندىرۋ جانە يننوۆاسيالىق تەحنولوگيالار جونىندەگى كەڭەسشىسى بولعان باعدات مۋسين  كەلدى.

ۇكىمەت قاۋلىسىمەن سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ ءبىرىنشى ۆيسە-مينيسترى بولىپ تاعايىندالعان باعدات مۋسين قىزمەتتەن كەتكەن جۇماعالييەۆ ورنىنا ۋاقىتشا مينيستر قىزمەتىن اتقارادى.  

پرەمەر-مينيستر سايتىندا جاريالانعان اقپاراتتىق حابارلامادا مينيسترلىكتىڭ الدىنا مەملەكەتتىك قىزمەتتەر مەن ەكونوميكا سالالارىن سيفرلاندىرۋ جونىندە ناقتى مىندەتتەر قويىلعانى، دەنساۋلىق ساقتاۋ جانە ءبىلىم بەرۋ سالاسىن سيفرلاندىرۋ ماسەلەسىنە ەرەكشە كوڭىل ءبولۋ قاجەتتىگى ايتىلعان.

ەكس-مينيستر اسقار جۇماعالييەۆ تۇسىندا مينيسترلىك توتەنشە جاعداي كەزىندە ەلەكتروندىق قىزمەتتەردى دۇرىس جۇرگىزە الماعانى ءۇشىن وتكىن سىنعا ۇشىراعان. 42500 تەڭگە الەۋمەتتىك تولەمگە ءوتىنىم قابىلدايتىن سەرۆيستەر باستاپقىدا بىرنەشە كۇن ءجوندى جۇمىس ىستەمەگەن.

قاشىقتان وقىتۋ كەزىندە ەلدىمەكەندەردىڭ ينتەرنەتپەن قامتىلۋ ماسەلەسى  قاعاز جۇزىندەگى دەرەكتەردەن  مۇلدە الشاق ەكەنى اشكەرەلەنگەن.

وسى رەتتە باعدات مۋسينگە اۋىلدىق ەلدى مەكەندەردى ساپالى ينتەرنەتپەن قامتاماسىز ەتۋ، قازاقستاننىڭ يننوۆاسيالىق ەكوجۇيەسىن دامىتۋ ماسەلەلەرى  جۇكتەلىپ وتىر.

باعدات مۋسين 1983 جىلى پاۆلودار وبلىسى، ەكىباستۇز قالاسىندا دۇنيەگە كەلگەن. 

2004 جىلى سۇلەيمەن دەميرەل اتىنداعى ۋنيۆەرسيتەتتى ينجەنەر-باعدارلاماشى، 2006 جىلى قازاق قۇقىقتانۋ جانە حالىقارالىق قاتىناستار ينستيتۋتىن قۇقىقتانۋ ماماندىعى بويىنشا ءتامامداعان. 

2004 جىلعا دەيىن ءبىلىم الا ءجۇرىپ «NAT» اق، «ىزەت» ج ش س جانە باسقا دا جەكە كومپانيالاردا جۇمىس ىستەگەن. 

2004 جىلدىڭ قىركۇيەك ايىنان باستاپ «ۇلتتىق اقپاراتتىق تەحنولوگيالار» اكسيونەرلىك قوعامىندا ينجەنەر-باعدارلاماشى، كۋالاندىرۋ ورتالىعى ءبولىمىنىڭ باسشىسى، مەملەكەتتىك ورگانداردا IT بولىمشەلەر قۇرۋ دەپارتامەنتى ديرەكتورىنىڭ ورىنباسارى. 

2004-2007 جىلدارى قوسىمشا «AMANAT-insurance» بك» اكسيونەرلىك قوعامىندا اقپاراتتىق تەحنولوگيالار جونىندەگى كەڭەسشى-كونۋلتتانت. 

2007 جىلدان باستاپ ادىلەت ءمينيسترىنىڭ اقپاراتتىق تەحنولوگيالار جونىندەگى كەڭەسشىسى جانە اقپاراتتىق تەحنولوگيالار باسقارماسىنىڭ باسشىسى. 

2010 جىلدىڭ ءساۋىر ايىنان بايلانىس جانە اقپارات مينيسترلىگىندە (كولىك جانە كوممۋنيكاسيا مينيسترلىگى) اقپاراتتىق تەحنولوگيالار سالاسىنداعى مەملەكەتتىك ساياسات دەپارتامەنتى ديرەكتورىنىڭ ورىنباسارى. 

2011 جىلدىڭ ءساۋىر ايىنان مەملەكەتتىك قىزمەتتەردى اۆتوماتتاندىرۋدى باقىلاۋ جانە حالىققا قىزمەت كورسەتۋ ورتالىقتارىنىڭ قىزمەتىن ۇيلەستىرۋ كوميتەتى ءتوراعاسىنىڭ ورىنباسارى. 

2012 جىلدىڭ ناۋرىز ايىنان مەملەكەتتىك قىزمەتتەردى اۆتوماتتاندىرۋدى باقىلاۋ جانە حالىققا قىزمەت كورسەتۋ ورتالىقتارىنىڭ قىزمەتىن ۇيلەستىرۋ كوميتەتى ءتوراعاسى. 

2014 جىلدىڭ ءساۋىر ايىنان «ۇلتتىق اقپاراتتىق تەحنولوگيالار» اكسيونەرلىك قوعامىنىڭ باسقارما ءتوراعاسى. 

2014 جىلدىڭ تامىز ايىنان «قازپوشتا» اكسيونەرلىك قوعامىنىڭ باسقارما ءتوراعاسى. 

2017 جىلدىڭ قاڭتار ايىنان قازاقستان رەسپۋبليكاسىنىڭ باس پروكۋراتۋراسىندا قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءتوراعاسى. 

2018 جىلدىڭ مامىر ايىنان Bi Group قۇرىلىس حولدينگى باسقارما ءتوراعاسىنىڭ ورىنباسارى جانە كورپوراتيۆتىك-ۆەنچۋرلىك قوردىڭ باسشىسى. 

2019 جىلدىڭ ماۋسىم ايىنان IT كاسىپكەر، ReKassa، Tastamat جانە باسقا دا IT-ستارتاپتاردىڭ نەگىزىن قالاۋشى. 

2020 جىلدىڭ ناۋرىز ايىنىنان بەرى قازاقستان رەسپۋبليكاسى پرەزيدەنتىنىڭ سيفرلاندىرۋ جانە يننوۆاسيالىق تەحنولوگيالار جونىندەگى كەڭەسشىسى بولىپ قىزمەت ەتىپ كەلدى. 

«ەرەن ەڭبەگى ءۇشىن» مەدالىمەن، «قازاقستان رەسپۋبليكاسىنىڭ تاۋەلسىزدىگىنە 20 جىل» مەرەكەلىك مەدالىمەن ماراپاتتالعان. 

قازاق، ورىس، اعىلشىن تىلدەرىن ەركىن مەڭگەرگەن، تۇرىك تىلىندە ويىن جەتكىزە الادى.