ەلىمىزدىڭ قۇتقارۋشىلارى سۋعا شومىلۋ ماۋسىمى باستالعالى بەرى 51 ادامدى، ونىڭ ىشىندە 11 بالانى قۇتقاردى. بۇل تۋرالى توتەنشە جاعدايلار كوميتەتى حابارلادى.

كوميتەتتىڭ حابارلاۋىنشا، سۋعا شومىلۋ ماۋسىمى باستالعالى بەرى ەلىمىزدىڭ سۋ ايدىندارىندا ءتۇرلى توتەنشە وقيعالار ورىن الىپ جاتىر. وتكەن دەمالىس كۇندەرى 15 ادام سۋعا باتىپ كوز جۇمعان. ولاردىڭ 5-ەۋى – بالالار.

19 شىلدە كۇنى قۇتقارۋشىلار اقمولا وبلىسىنىڭ جالتىركول اۋىلىنان 5 شاقىرىم جەردە  ەسىل وزەنىنەن 2005 جانە 2008 جىلى تۋعان بالالاردىڭ ءمايىتىن سۋدان الىپ شىققان. ولار تىيىم سالىنعان جەردە سۋعا شومىلىپ جۇرگەندە باتىپ كەتكەن.

ەلىمىزدە سۋعا شومىلۋ ماۋسىمى باستالعاننان بەرى 144 ادام، ونىڭ ىشىندە 43 بالا سۋعا باتىپ كوز جۇمعان. ادامدار ءوز كۇشىن بىلمەگەنىنەن، ماس كۇيىندە سۋعا شومىلعاننان، ەرەسەك ادامدار بالالارىن قاراۋسىز قالدىرعانىنان جانە سۋعا باتىپ بارا جاتقان ادامدى قۇتقارامىن دەپ سۋعا باتىپ قازا بولعان.

قۇتقارۋشىلار 1 ماۋسىمنان باستاپ 51 ادامدى، ونىڭ ىشىندە 11 بالانى اجالدان امان الىپ قالعان.

"ءىىم تج كوميتەتى ازاماتتاردى سۋ ايدىندارىنداعى قاۋىپسىزدىك ەرەجەلەرىن ساقتاۋعا شاقىرادى:

- بالالار تەك ەرەسەك ادامداردىڭ قاراۋىمەن سۋعا شومىلۋى ءتيىس؛

- تەك سۋعا شومىلۋ ءۇشىن جابدىقتالعان ورىنداردا سۋعا شومىلۋعا بولادى، وندا قۇتقارۋشىلار كەزەكشىلىك ەتەدى؛

- بەيتانىس ورىنداردا سۇڭگۋگە بولمايدى؛

- وسى ماقساتتارعا بەيىمدەلمەگەن بيىكتىكتەردەن سەكىرۋگە بولمايدى؛

- سۋعا شومىلعان كەزدە ءوز كۇشتەرىڭىزدى دۇرىس باعالاڭىزدار؛

- سپيرتتىك ىشىمدىكتەر ىشۋگە جانە ماس كۇيىندە سۋعا شومىلۋعا قاتاڭ تىيىم سالىنادى" دەلىنگەن توتەنشە جاعدايلار كوميتەتىنىڭ حابارلاماسىندا.