كوروناۆيرۋسقا بايلانىستى الەم ەلدەرىنىڭ ستاتيستيكاسىن جاريالاپ وتىراتىن worldometers.info سايتىنىڭ 23 شىلدەدەگى دەرەگىنشە، دۇنيەجۇزىندە COVID-19 جۇقتىرعاندار سانى 15،4 ميلليونعا جۋىقتاعان. ىندەتتەن كوز جۇمعاندار سانى 630 مىڭنىڭ ۇستىندە. 

اقش ءولىم بويىنشا دا، جۇقتىرعاندار سانى جونىنەن دە دۇنيەجۇزىندە ءالى الدا تۇر. ەلدە 4،1 ميلليوننان استام ادامنان كوروناۆيرۋس تابىلعان. ولگەندەر سانى 146 مىڭنىڭ ۇستىندە. دۇنيەجۇزىندە ۆيرۋس جۇقتىرعانداردىڭ ۇشتەن بىرگە جۋىعى اقش ۇلەسىندە. 

اقش-تان كەيىنگى ورىندا تۇرعان برازيليادا دا ىندەت ءورشىپ تۇر. سوڭعى اقپارات بويىنشا، ەل حالقىنىڭ ءبىر پايىزدان استامىنا (2 231 871) كوروناۆيرۋس جۇققان. وسى ۋاقىتقا دەيىن ولاردىڭ 82 890-ى كوز جۇمعان. 

جۇقتىرعاندار سانى جونىنەن 7-ورىندا تۇرعان مەكسيكادا ءولىم كوبەيىپ بارادى. سوڭعى تاۋلىكتە ەلدە 790 ادام كوروناۆيرۋستان كوز جۇمىپ، ولگەندەردىڭ جالپى سانى 41 مىڭنان استى. بۇل – دۇنيەجۇزى بويىنشا ءتورتىنشى كورسەتكىش. 

سوڭعى كۇندەرى فيليپيندە دە كوروناۆيرۋس ءورشىپ تۇر. ەلدە ۆيرۋس جۇقتىرعاندار 72 مىڭنان استى. بۇل ەل جۇقتىرعان سانى جونىنەن العاشقى 30 ەلدىڭ قاتارىندا.

كوروناۆيرۋس وشاعى رەتىندە سانالعان قىتايدا وتكەن تاۋلىكتە 22 ادامنان COVID-19 تابىلدى.