"سوڭعى جىلدارى جۇڭگو 5G جانە كۆانتتىق شيفرلاۋ تەحنولوگياسى جاعىنان باتىس ەلدەرىنەن اسىپ كەتتى" دەيدى ۋولل-ستيرت دجورنەل. باسىلىمنىڭ جازۋىنشا، ەندى بەيجىڭ عارىش سالاسىنان دا العا شىعۋى مۇمكىن. 

جۇڭگو بۇگىن مارسقا عارىش زىمىرانىن ءساتتى ۇشىردى. امەريكا بىرنەشە ميسسيا ارقىلى قىزىل عالامشارعا جىبەرگەن قۇرىلعىلاردى بەيجىڭ ءبىر جولدا اتتاندىرعان.

ۋولل-ستيرت دجورنەلدىڭ اقپاراتىنشا، بەيجىڭ عارىش سالاسىندا وتە كەرەمەت تابىستارعا قول جەتكىزۋدە. 2018 جىلدان بەرى جۇڭگو مەملەكەتى دۇنيەجۇزى بويىنشا ەڭ كوپ زىمىران ۇشىرعان. عارىشتىق باعدارلامالارعا قارجى ءبولۋ جاعىنان دا الەم بويىنشا ەكىنشى ءىرى ەل.

عارىش سالاسىنىڭ تاۋەلسىز ساراپشىسى نامراتا گوسۆامي ەكى ەلدىڭ عارىشتىق باعدارلامالارىنا سالىستارا تالداۋ جاساعاندا، قىتايدىڭ بۇل سالاداعى كەيبىر ارتىقشىلىقتارى اقش-تان دا اسىپ كەتەتىنىن مالىمدەدى.

بەيجىڭ كوممۋنيستىك پارتيانىڭ تۇراقتى باسقارۋىندا بولعاندىقتان، ولار ون جىلعا جالعاساتىن باعدارلامالاردى جاساي الادى.

ونىڭ ايتۋىنشا، ءبىر پارتيالى تۇراقتى جۇڭگو بيلىگى عارىش باعدارلاماسى ءۇشىن ۇزاقمەزىمدى، وزگەرمەيتىن جوسپار جاساي الادى. مىسالى، بەيجىڭ 2036 جىلعا دەيىن ايدا ماڭگىلىك بازا قۇرماق.

ال NASA، اقش كونگرەسى جانە باسقا عارىش قاۋىمداستىقتارى "كۇشىمىزدى ايعا قايتا باعىتتايمىز با؟" دەپ ونداعان جىلدار بويى پىكىرتالاس جۇرگىزىپ قانا كەلەدى.

ساراپشىنىڭ ايتۋىنشا، قۇراما شتاتتارداعى پروبلەما-اكىمشىلىكتەر اۋىسقان سايىن ماقساتتار وزگەرە بەرەدى. باراك وباما "ءبىز ايعا ەندى بارمايمىز" دەسە، ترامپ كەلىپ "ءبىز ايعا بارامىز، سوسىن مارسقا جەتەمىز" دەپ جاريالاعان.

"امەريكالىقتار پىكىر تالاستىرىپ جاتقاندا، جۇڭگو ۇلكەن تابىستارعا جەتىپ جاتتى" دەيدى باسىلىم. بەيجىڭ وتكەن جىلى روبوتتى بارلاۋشىنى ايدىڭ ارعى بەتىنە قوندىردى. ال مۇنى وعان دەيىن ەشقانداي مەملەكەت جاساي الماعان.

دەگەنمەن قۇراما شتاتتاردىڭ ارتىقشىلىعى- NASA مەن كەيبىر عارىشتىق كومپانيالاردىڭ سەرىكتەستىگى. NASA عارىشكەرلەر جانە تۋريستەردى وربيتاعا جىبەرۋ ءۇشىن ءىرى كومپانيالارمەن ميللياردتاعان دوللارلىق كەلىمشارت جاساعان. "بىزدە زىمىرانداردى جاقسى كورەتىن بايلار بار" دەگەن اقش پرەزيدەنتى دونالد ترامپ SpaceX سياقتى جەكەلىك كومپانيالارمەن بىرگە عارىشتى يگەرۋدى قولدايدى.

"ءبىراق سوڭعى جىلدارى جۇڭگو 5G جانە كۆانتتىق شيفرلاۋ تەحنولوگياسى جاعىنان باتىس ەلدەرىنەن اسىپ كەتتى" دەيدى ۋولل-ستيرت دجورنال. بۇل تەحنولوگيالار قىتايدىڭ عارىش سالاسىنداعى دامۋىن جەدەلدەتەدى. 

2026 جىلعا دەيىن مارستان توپىراق پەن تاۋ جىنىستارىنىڭ ۇلگىلەرىن الىپ كەلۋ ءۇشىن NASA ەۋروپالىق عارىش اگەنتتىگىمەن سەرىكتەس بولعان.

الايدا جۇڭگو بارلىعىن جالعىز ءوزى ىستەپ جاتىر. باسىلىمنىڭ جازۋىنشا، بۇل بەيجىڭنىڭ ءوز تالعامى ەمەس. NASA قىتايمەن ەشقاشان جۇمىس ىستەمەگەن، وعان سەبەپ، امەريكا ۇلتتىق قاۋىپسىزدىك ماسەلەسىنەن الاڭدايدى.

ۆاشينگتون ءتىپتى جۇڭگو عارىشكەرلەرىنىڭ حالىقارالىق عارىش ستانسياسىنا (حعس) قوسىلۋىنا تىيىم سالعان ءارى "قاقپاجولى باعدارلاماسىنا" (ايدى اينالاتىن عارىش ستانسياسى) بەيجىڭنىڭ مۇشە بولۋىنا رۇقسات بەرمەگەن. 

سول سەبەپتى جۇڭگو ءوزىنىڭ مارس ميسسياسىن تاۋەلسىز تۇردە جاساپ جاتىر. بۇل 2028 جىلعا دەيىن جۇزەگە اسادى دەپ بولجانۋدا. 

"ەگەر اقش بەيجىڭدى عارىشتىق سەرىكتەستىكتەن شەكتەسە، جۇڭگو عارىش باعدارلاماسىن دەربەس تۇردە دامىتادى. بۇل كەمشىلىكتى ارتىقشىلىققا اينالدىرادى" دەيدى تاۋەلسىز ساراپشى نامراتا گوسۆامي.

ال عارىشتى باعىندىرۋعا تالاس قاتتى كۇشەيگەنىن مويىنداعىن اقش ۆيسە-پرەزيدەنتى مايك پەنس "ءبىز ءقازىر عارىشتىق باسەكەدەمىز. بۇل باسەكە 1960 جىلدارداعىمەن بىردەي، ءتىپتى ودان دا اۋىر باسەكە" دەپ مالىمدەگەن.