بالقاش قالاسىندا پوليسيا قىزمەتكەرى ءجاسوسپىرىم قىزدى زورلادى دەگەن كۇدىككە ءىلىندى. بۇل تۋرالى "نە مولچي KZ" ۇيىمى حابارلادى. 

"وقيعا 5 شىلدە كۇنى بالقاش قالاسىندا بولعان. باستاپقىدا پوليسيا قىزمەتكەرى 14 جاستاعى ءجاسوسپىرىم قىزدى ۇناتىپ قالىپ، ءوزىنىڭ ارام ويىن ىسكە اسىرماق بولعان. ول قىزدىڭ اناسىنا "ساياجايلارىڭا ۇرى ءتۇستى، ول سەندەردىڭ اۋلالارىڭا ەسىرتكى ءوسىردى" دەپ الداپ، قىزىنىڭ ءنومىرىن سۇراپ العان. كەيىن قۇقىق قورعاۋ ورگانىنىڭ قىزمەتكەرى قىزعا حابارلاسىپ، "سەن ەسىرتكى قابىلدادىڭ" دەپ بوپسالاعان. پوليسەي  ءجاسوسپىرىم قىزعا "اكەڭدى 10 جىلعا تۇرمەگە قامايدى" دەپ قوقان-لوققى كورسەتىپ، ءوزىنىڭ دەگەنىنە كوندىرمەك بولادى.

پوليسەي 5 شىلدە كۇنى WhatsApp مەسسەندجەرى ارقىلى حابارلاسىپ، قاجەتتى قۇجاتتارعا قول قويۋ كەرەگىن ايتىپ، كەزدەسۋگە شاقىرادى. ءجاسوسپىرىم قىز قورىققانىنان ءوزى تۇراتىن ءۇيىنىڭ مەكەنجايىن ايتقان. پوليسەي ۇيىنە كەلىپ، جاسوسپىرىمگە ەسىرتكى قابىلداعانى تۋرالى مويىنداۋ حات جازعىزىپ الادى. سودان سوڭ ونى جىنىستىق قاتىناسقا يتەرمەلەپ، بولعان ءجايت تۋرالى  اتا-اناسىنا ايتپاۋعا ۋادە بەرگىزەدى" دەلىنگەن "نە مولچي KZ" ۇيىمىنىڭ Facebook-تاعى جازباسىندا. 

ۇيىم وكىلدەرىنىڭ ايتۋىنشا، بارلىق جازبا مەن قوڭىراۋلار ساقتالعان.

"ءجاسوسپىرىم قىز ءبىر اپتا بويى ۇندەمەيدى. سودان 12 شىلدەدە ۇلكەن اپكەسىنە كورشى پوليسەيدىڭ بوپسالاپ، زورلاعانىن ايتىپ بەرەدى. كەيىننەن اناسى بالقاش قالاسىنىڭ پوليسياسىنا ارىز جازعان. الايدا پوليسيا ءىستى قوزعاۋدان باس تارتىپ وتىر. ولار ءوز قىزمەتكەرىنە قاتىستى ءىس قوزعاي المايتىنىن ايتىپ، قۇجاتتاردى قاراعاندى وبلىستىق پوليسيا دەپارتامەنتىنە جولدادى.

جابىرلەنۋشىگە ەشقانداي دا ساراپتامالىق اناليز سىندى تەكسەرىستەر جۇرگىزىلمەگەن. ءبىراق پوليسەي بولعان وقيعادان كەيىن 13 شىلدەدە جۇمىستان قۋىلعان. كەيىن پوليسەي قىزدىڭ اناسىنان ارىزدى قايتارىپ الۋدى سۇراعان.  ول قىزعا وتكەن جىلى 14 جاسىندا  (ءقازىر قىز 15 جاستا) عاشىق بولىپ قالعانىن جانە وتباسىندا جالعىز اسىراۋشى ەكەنىن ايتقان.

"نەمولچيKZ" قورىنىڭ وكىلدەرى قىزدىڭ اناسىنان ءوتىنىش الدى جانە ەندى ءبىز قاراعاندى وبلىسى پوليسيا دەپارتامەنتىنىڭ باستىعىنان وسى قىلمىستىق ءىستى ءوز باقىلاۋىنا الۋىن جانە ءوزىنىڭ قىزمەتتىك لاۋازىمىن پايدالانىپ، اۋىر قىلمىس جاساعان كۇدىكتى پەدوفيلدى جاۋاپقا تارتۋدى تالاپ ەتۋىڭىزدى سۇرايمىز" دەلىنگەن ۇيىمنىڭ جەلىدەگى جازباسىندا.