بەيجىڭ-ۆاشينگتون اراسىنداعى جاعداي ۋشىعۋىپ، جۇڭگو وڭتۇستىك-باتىستاعى چەندۋ قالاسىندا ورنالاسقان اقش كونسۋلدىعىن جابۋعا بۇيرىق بەردى. بۇل تۋرالى قامشى ءتىلشىسى BBC-گە سىلتەمە جاساپ حابارلايدى.
جۇڭگو بۇل قادامدى اقش-قا "قاجەتتى جاۋاپ" دەپ اتادى، سەبەبى سارسەنبىدە ترامپ اكىمشىلىگى قىتايدىڭ حيۋستونداعى كونسۋلدىعىن 72 ساعات ىشىندە جابۋعا بۇيرىق بەرگەن.
اقش مەملەكەتتىك حاتشىسى مايك پومپەو ۆاشينگتوننىڭ شەشىمى قىتايدىڭ زياتكەرلىك مەنشىكتى "ۇرلاپ جاتقاندىعىنا" بايلانىستى قابىلدانعانىن مالىمدەگەن.
بەيجىڭ بۇل قادامدى "ساياسي ارانداتۋشىلىق" دەپ اتاعان.
ءبىراق ترامپ جۇڭگو كونسۋلدىقتارىنىڭ كوبىن جابۋعا بۇيرىق بەرەتىنى "ءارقاشان مۇمكىن" ەكەنىن مالىمدەگەن.
ءبىراز ۋاقىتتان بەرى اقش پەن جۇڭگو اراسىندا شيەلەنىس كۇشەيە ءتۇستى. قۇراما شتاتتار پروكۋرورلارىنىڭ سوتقا بەرگەن مالىمەتتەرى بويىنشا، امەريكاداعى جۇڭگو زەرتتەۋشىلەرى ۆيزالىق الاياقتىعى ءۇشىن قاماۋعا الىنعان. ۆاشينگتون "ۆيزالىق الاياقتىق جاسادى جانە اسكەري بايلانىستاردى جاسىردى" دەپ كۇدىكتەنگەن جۇڭگو عالىمى سان-فرانسيسكوداعى جۇڭگو كونسۋلدىعىنا قاشىپ تىعىلعانىن مالىمدەگەن.
ترامپ اكىمشىلىگى بەيجىڭدى ساۋدا جانە كوروناۆيرۋستىق پاندەمياعا قاتىستى بىرنەشە رەت ايىپتاعان، سونداي-اق جۇڭگو گونكونگقا قاۋىپسىزدىك تۋرالى داۋلى جاڭا زاڭ قابىلدادى.
ال ترامپ قىتايدىڭ شىڭجاڭ پروۆينسياسىنداعى ەتنيكالىق قازاقتار مەن ۇيعىرلاردىڭ قىسىمعا ۇشىراۋىنا قاتىسى بار 50-گە جۋىق قىتايلىق كومپانياعا سانكسيا سالدى.
پىكىر قالدىرۋ