NASA "ىقتيمال ءقاۋپى بار" دەلىنگەن استەرويد 24 شىلدەدە جەرگە جاقىنداي تۇسەتىنىن مالىمدەگەن بولاتىن.

"استەرويد 2020ND" دەپ اتالعان اسپان دەنەسى شامامەن بايتەرەك مونۋمەنتىنەن ەكى ەسەگە جۋىق ۇلكەن. جەر عالامشارىنا جاقىندايدى دەلىنگەن استەرويدتىڭ ۇزىندىعى – 170 مەتر.

NASA عالىمدارى استەرويدتىڭ جەر وربيتاسىنا قاراي ۇشىپ كەلە جاتقانىن جانە پلانەتامىزدان بار بولعانى 0،034 استرونوميالىق بىرلىگىندەي (اب) قاشىقتىقتا بولاتىنىن ەسكەرتەدى. سەكۋندىنا 14 شاقىرىم جىلدامدىقپەن قوزعالىپ بارا جاتقان اسپان دەنەسى جەرگە 5.57 ميلليون شاقىرىمعا دەيىن جاقىندايدى.

NASA-نىڭ اقپاراتىنشا، وربيتالىق قاشىقتىق 0،05 استرونوميالىق بىرلىكتەن از بارلىق استەرويدتار "ىقتيمال ءقاۋىپتى استەرويدتار" بولىپ سانالادى. 

استەرويدتىڭ جالپى قوزعالىس بارىسىن تومەندەگى ۆيدەو ارقىلى كورۋگە بولادى.

ۆيدەوداعى كورسەتىلىم بويىنشا، اسپان دەنەسىنىڭ جەرمەن اراقاشىقتىعى "ىقتيمال ءقاۋىپتى" وربيتالىق قاشىقتىقتان (0،05 استرونوميالىق بىرلىكتەن) جاقىن بولاتىن ۋاقىتى 20 شىلدەدەن 28 شىلدەگە دەيىن جالعاسادى.

ال، ءبىزدىڭ عالامشارىمىزعا ەڭ جاقىن كەلەتىن كەزى الەمدىك ورتاق ۋاقىت (UTC) بويىنشا 24 شىلدە 2:00-دەن 25 شىلدە 00:00 ارالىعى. ال، بۇل الماتى ۋاقىتى بويىنشا 24 شىلدە تاڭعى 8:00-دەن 25 شىلدە تاڭعى 6:00-عا دەيىنگى ارالىق. وسى كەزدە استەرويد جەردەن 0،037 استرونوميالىق بىرلىگىندەي قاشىقتىقتا بولادى. الماتى ۋاقىتى بويىنشا 25 شىلدە 8:00-دەن باستاپ اسپان دەنەسى الىستاي باستايدى.