جۇڭگو اگرەسسياسىمەن كۇرەسۋ ءۇشىن ءۇندىستان اسكەري-تەڭىز جاتتىعۋلارىنا اۆستراليانى قاتىسۋعا شاقىردى، دەپ حابارلادى Daily Mail.

بەيجىڭ مەن نيۋ-دەلي اراسىنداعى قارىم-قاتىناس گيمالاي شەكاراسى بويىنداعى قاندى قاقتىعىستاردان كەيىن شيەلەنىسە ءتۇستى. گالۆان القابىنداعى قاقتىعىس كەزىندە كەمىندە 20 ءۇندى اسكەري قىزمەتكەرى قازا تاپقان.

ەندى ءۇندىستان اۆستراليانى مالابار اسكەري تەڭىز جاتتىعۋلارىنا قاتىسۋعا شاقىرىپ، كوممۋنيستىك ەلگە قارسى كۇرەس جۇرگىزۋدە.

اقش، جاپونيا جانە ءۇندىستان قاتىسقان ءۇشجاقتى اسكەري شارا 1992 جىلدان بەرى وتكىزىلىپ كەلەدى.

بەيجىڭ اۆستراليالىق اسكەري كەمەلەر بەنگال شىعاناعى جاتتىعۋىنا قاتىسقانىنا اشۋلانعاننان كەيىن ءۇندىستان شاقىرۋدى كەرى قايتارىپ العان.

ءبىراق ءقازىر قىتايدىڭ ايماقتا تەرريتورياسىن كەڭەيتۋىنە ۇرەي تۋۋدا. ءۇندى-تىنىق مۇحيتى ەلدەرى بەيجىڭگە قارسى تۇرۋ ءۇشىن وداقتاس ىزدەۋدە.

اۆستراليانىڭ جاتتىعۋعا قاتىساتىنى ءالى راستالماعانىمەن، ءۇندىستاندىق بۇقارالىق اقپارات قۇرالدارى بۇل ۋاقىتتىڭ ەنشىسىندە دەيدى.

كانبەررانىڭ ۇسىنىستى ويلاستىرىپ جاتۋى بەيجىڭنىڭ قيتىعىنا ءتيدى. قىتايلىق گلوبال تايمس باسىلىمى "بۇل بەيجىڭنىڭ قاۋىپسىزدىگىنە قاتەر توندىرەدى" دەپ مالىمدەگەن.

– ەگەر اۆستراليا كەلەسى مالابار جاتتىعۋلارىنا قوسىلسا، بۇل اقش، جاپونيا، اۆستراليا جانە ءۇندىستان اراسىنداعى بەيرەسمي ستراتەگيالىق فورۋم بولماق، ءتورتجاقتى قاۋىپسىزدىك مۇشەلەرىنىڭ اسكەري ديالوگى العاش رەت ۇيلەستىرىلەدى، – دەيدى قىتايلىق باسىلىم.

سوڭعى جىلدارى كانبەررا ءۇندىستاننىڭ ميللياردتان استام حالقى بار تۇتىنۋ نارىعىنا نازار اۋدارعان جانە بۇل بىرلەسكەن جاتتىعۋ كەلىسىمنىڭ كەپىلى بولا الادى.

"ەكى ەل اراسىنداعى تىعىز ساۋدا بايلانىسى اۆستراليانىڭ تاۋ-كەن جانە اۋىلشارۋاشىلىق سالالارى ءۇشىن ۇلكەن ناتيجە اكەلۋى مۇمكىن" دەپ حابارلادى MailOnline.

COVID-19 باستالعاننان باستاپ، اۆستراليا مەن قىتايدىڭ قارىم-قاتىناسى ناشارلاپ كەتتى جانە اۆستراليا پرەمەر-مينيسترى سكوتت مورريسون كوروناۆيرۋستىڭ باستالۋى تۋرالى تاۋەلسىز حالىقارالىق زەرتتەۋ جۇرگىزۋگە شاقىرعان.

بەيجىڭ وعان جاۋاپ رەتىندە اۆستراليالىق بيداي ەكسپورتىنا تاريفتەر ەنگىزگەن جانە كانبەررانىڭ ءىرى سيىر ەتىن جەتكىزۋشىلەردىڭ ۇشەۋىن قارا تىزىمگە ەنگىزگەن.