بۇگىن قوستاناي وبلىسىندا ەكى جول اپاتى بولىپ، سالدارىنان ءۇش ادام كوز جۇمدى. بۇل تۋرالى وبلىستىق پوليسيا دەپارتامەنتىنىڭ باسپا ءسوز قىزمەتى حابارلادى.
ولاردىڭ مالىمەتىنشە، بۇگىن ساعات 16.00-دە قوستاناي-رۋدنىي اۆتوجولىنىڭ 10-شاقىرىمىندا پاترۋلدىك پوليسيا اۆتوكولىگى "ۆاز 2115" كولىگىنە سوقتىعىسىپ، 4 جاسار بالا وقيعا ورنىندا قازا بولعان.
دەپارتامەنت تاراتقان حابارلاماعا قاراعاندا پاترۋل كولىگى سول جولدىڭ بويىندا بولعان باسقا اپاتتى تەكسەرۋگە بارا جاتقان.
– اۆتوپاترۋل وسى جولدىڭ 17-شاقىرىمىندا بولعان جول اپاتىنا بارا جاتقان. بىرەر ساعات بۇرىن تاعى ءبىر "ۆاز 2115" كولىگىنىڭ 26 جاستاعى جۇرگىزۋشىسى رولگە يە بولا الماي، جولدان شىعىپ كەتكەن بولاتىن. سالدارىنان ەكى ادام كوز جۇمدى. بۇل دەرەك بويىنشا قىلمىستىق كودەكستىڭ 345-بابى (كولiك قۇرالدارىن پايدالانۋ قاعيدالارىن بۇزۋ) بويىنشا ءىس قوزعالدى، – دەدى پوليسيا دەپارتامەنتى باسپا ءسوز قىزمەتىنىڭ وكىلى كەنجە قونىسباي.
دەپارتامەنت باسپا ءسوز قىزمەتىنىڭ مالىمەتىنشە، پاترۋل كولىگى جول ۇستىندە دابىل بەلگىسىن قوسىپ جۇرگەن. ءقازىر وسى وقيعا بويىنشا قىزمەتتىك تەكسەرۋ باستالدى.
پىكىر قالدىرۋ