الماتى اكىمدىگى قالا تۇرعىندارىنا ءمايىتحانا جانىندا توپتالىپ جۇرمەۋگە شاقىردى. قالالىق پاتولوگواناتوميالىق بيۋرو جانىنا توپتالىپ جينالعان تۇرعىندارعا قاتىستى الماتى قالاسى قوعامدىق دەنساۋلىق باسقارماسى تۇسىنىك بەردى.

«قۇرمەتتى قالا تۇرعىندارى، ەڭ الدىمەن، مارقۇمداردىڭ تۋىستارى مەن جاقىندارىنا كوڭىل ايتامىز! دۇرلىگۋ كەيدە 2-دەن 10 ادامعا دەيىن تۋىستاردىڭ توپتالىپ جۇرۋىنە بايلانىستى تۋىندايدى. شىنىمەن، جاقىنىن جوعالتىپ، اۋىر كۇيدە جۇرگەندىكتەن، بيۋرو قاقپاسىندا دۇربەلەڭ، ابىرجۋ، ۋ-شۋ ورىن الۋدا»، - دەدى الماتى قالاسى قوعامدىق دەنساۋلىق باسقارماسىنىڭ شجق «قالالىق پاتولوگواناتوميالىق بيۋرو» كمك ديرەكتورى باقىتجان الىبەكوۆ.

ول حالىقتى قاۋىپسىزدىك شارالارى مەن كارانتين، سانيتاريالىق-ەپيدەميولوگيالىق تالاپتاردى ساقتاۋعا شاقىردى.

«قالا تۇرعىندارىن كوروناۆيرۋس ينفەكسياسىنىڭ كەزەكتە تۇرعان ادامدار اراسىندا جۇعۋ ءقاۋپىن بولدىرماۋ ءۇشىن، قاشىقتىقتى ساقتاپ، ماسكا تاعۋ رەجيمىن ساقتاۋعا شاقىرامىز. پاتولوگواناتوميالىق بيۋرو قىزمەتكەرلەرى تۋىستارىنا شىعىپ، ءمايىتتى بەرۋ ءتارتىبى تۋرالى حاباردار ەتىپ، ءتۇسىندىرۋ جۇمىستارىن جۇرگىزەدى» – دەدى الماتى قالاسى قوعامدىق دەنساۋلىق باسقارماسىنىڭ شجق «قالالىق پاتولوگواناتوميالىق بيۋرو» كمك ديرەكتورى باقىتجان الىبەكوۆ.

"قايتىس بولعانداردىڭ دەنەسى قالالىق پاتولوگواناتوميالىق بيۋروعا تۇسكەننەن كەيىن 12 ساعات ىشىندە قايتارىلادى. مەديسينالىق مەكەمە قايتىس بولۋ سەبەپتەرىن انىقتاۋ جانە قايتىس بولعان ادام جايلى سەنىمدى دەرەكتەر بەرۋ ءۇشىن ءمايىتتى اتالمىش ۇيىمعا تاپسىرادى. بۇل قوسىمشا ۋاقىتتى قاجەت ەتەدى"، - دەدى بيۋرو باسشىسى.

بارلىق سۇراقتار بويىنشا تۇرعىندار 246-62-70 بايلانىس ءنومىرى ارقىلى اقپارات الۋعا بولادى. «قالالىق پاتولوگواناتوميالىق بيۋرو» مايىتتەردى بەرۋ جونىندە ءموبيلدى توپ ۇيىمداستىردى. بۇل توپ قىزمەتكەرلەرى كارانتين رەجيمىن ساقتاۋ ماقساتىندا كوشەدە (قاقپانىڭ جانىندا) قايتىس بولعان ادامداردىڭ مالىمەتتەرىن سالىستىرىپ، تىركەۋدى جۇزەگە اسىرىپ جاتىر.