الماتىدا تامىزدىڭ اياعىنا دەيىن قوسىمشا كوۆيد ستاسيونارلارى اشىلادى. بۇل تۋرالى وڭىرلىك كوممۋنيكاسيا قىزمەتىنىڭ الاڭىندا وتكەن ونلاين-بريفينگ بارىسىندا الماتى قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى كامالجان نادىروۆ مالىمدەدى.

وسى اپتادا كەلەسى نىساندار قايتا جاساقتاۋدان وتكەن: «قازاقستان» ساناتوريي – 250 ورىن، «كوكتەم» – 376 ورىن، «سامال» پانسيوناتى – 140 ورىن، ۇوس مۇگەدەكتەرىنە ارنالعان رەسپۋبليكالىق كلينيكالىق گوسپيتال – 100 ورىنعا قايتا جاساقتالىپ، قولدانۋعا بەرىلەتىن بولادى. سپيكەر بۇل جاڭا ستاسيونارلاردىڭ ءقازىر قىزمەت ەتىپ جاتقاندارعا قوسىمشا رەتىندە اشىلاتىنىن اتاپ ءوتتى.

سونىمەن بىرگە، الداعى ۋاقىتتا مەگاپوليستە 500 ورىنعا ارنالعان ارنايى الەۋمەتتىك قىزمەتتەر كورسەتۋ ورتالىعى ىسكە قوسىلادى.

«اتالعان ورتالىق ءبىرىنشى ەشەلونداعى كوۆيدتى كلينيكا رەتىندە قىزمەت ەتەدى، ال كوۆيدتەن كەيىنگى كەزەڭدە تولىققاندى كوپسالالى ستاسيونار رەتىندە قىزمەت ەتەدى. ءقازىر وندا قۇرىلىس جۇمىستارى اياقتالۋدا، ونىمەن قوسا مەديسينالىق تەحنيكا جانە قاجەتتى ماماندارمەن قامتۋ ماسەلەسى دە قارالۋدا. اتالعان نىساندى قىركۇيەك ايىندا اشۋ مىندەتى قويىلعان»، — دەپ حابارلادى ك. نادىروۆ.