مەملەكەت باسشىسىنىڭ تاپسىرماسى بويىنشا حالىققا جوسپارلى مەديسينالىق كومەكتى 1 تامىزدان باستاپ قالپىنا كەلتىرۋ جوسپارلارى جاسالدى. ءبىرىنشى كەزەكتە كۆي-مەن كۇرەس جونىندەگى ءىس-شارالارعا قاتىستىرىلماعان باسقا ستاسيونارلاردى كەزەڭ-كەزەڭمەن قوسا وتىرىپ، رەسپۋبليكالىق دەڭگەيدەگى مامانداندىرىلعان كلينيكالاردا، ءمونوپروفيلدى كلينيكالاردا جوسپارلى ەمدەۋگە جاتقىزۋ قالپىنا كەلتىرىلەدى. الەۋمەتتىك مەديسينالىق ساقتاندىرۋ قورىنىڭ باسقارما ءتوراعاسى بولات توكەجانوۆ ورتالىق كوممۋنيكاسيالار قىزمەتى الاڭىندا وتكەن بريفينگتە وسىلاي دەدى.
پاندەميا كەزەڭىندە كوپتەگەن جوسپارلى قىزمەتتەر نەعۇرلىم كەش مەرزىمگە كەيىنگە قالدىرىلعانىن ەسكەرە وتىرىپ، قور حالىقتىڭ قىزمەتتەردى تۇتىنۋىنىڭ ايتارلىقتاي وسەدى دەپ بولجاپ وتىر. وسىعان بايلانىستى قور مەديسينالىق كومەك كورسەتۋدى قارجىلاندىرۋ جوسپارىنا تۇزەتۋلەر ەنگىزەدى. قور بولجامىنشا، 3 توقساندا جوسپارلى كومەك كولەمى ءمامس جۇيەسىن ەنگىزۋ كەزىندە جوسپارلانعانداي جىل باسىنداعى دەڭگەيگە دەيىن وسەدى.
انىقتاما ءۇشىن: بيىلعى جىلدىڭ 1 توقسانىندا تاۋلىكتىك ستاسيونارلاردا 827 مىڭ پاسيەنتكە (بۇل 2019 جىلمەن سالىستىرعاندا 15%-عا ارتىق) مامانداندىرىلعان مەديسينالىق كومەك كورسەتىلدى، جوسپارلى ەمدەۋگە جاتقىزۋ 79%-عا ارتتى. مەديسينالىق وڭالتۋ كولەمى 35%-عا ارتتى، بۇل رەتتە ينسۋلتتان كەيىن پاسيەنتتەردى قامتۋ 2،3 ەسەگە ءوستى.
جالپى العاندا، 1 توقساندا ءاربىر 3ء-شى پاسيەنت ءمامس قاراجاتى ەسەبىنەن ەمدەلدى.
«ءبىز دەنساۋلىق ساقتاۋ جۇيەسى ۆيرۋستى جەڭە الادى جانە قور پاسيەنتتەر الدىنداعى ءوزىنىڭ ىسكە اسىرىلماعان مىندەتتەمەلەرىنە قايتا ورالا الادى دەپ ۇمىتتەنەمىز»، - دەدى ب.توكەجانوۆ.
پىكىر قالدىرۋ