بولىپ جاتقان جاعدايعا بەيجاي قارامايتىن كاسىپكەر وسكەمەندەگى ءبىر اۋرۋحاناعا 45 انتيبيوتيك ينەكسياسى مەن 300 قۇتى دەكسامەتازون جانە 2 مىڭ مەديسينالىق ماسكا جىبەردى.
"وپتومەد" فارماسيەۆتيكالىق جەلىسىنىڭ باسشىسى وكسانا يابلوكوۆانىڭ ايتۋىنشا، وتكەن اپتادا كومپانيا تاپشى مەديكامەنتتەردى العان.
- ءبىز قابىنۋعا قارسى انتيبيوتيكتەر، ليەۆوفلوكساسين، ازيتروميسين، دەكسامەتازون، پاراسەتامول، اسپيرين مەن مەديسينالىق ماسكالاردى الدىق. مۇنىڭ ءبارى كوروناۆيرۋستى ەمدەۋگە كومەكتەسەدى. ءبىزدىڭ باسشىلىق اۋرۋحانالارعا كومەك كورسەتۋ تۋرالى شەشىم قابىلدادى. فيليالدارىمىزدا دارى-دارمەك قورى جەتكىلىكتى، - دەدى وكسانا يابلوكوۆا.
شقو تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى مەن شىعىس قازاقستان وبلىسىنىڭ كاسىپكەرلەرى ەمدەۋ مەكەمەلەرىنە بارلىق كومەكتى كورسەتۋدە.
- قازىرگى ۋاقىتتا بارلىق اۋرۋحانالار دارى-دارمەكپەن قامتاماسىز ەتىلدى. سوعان قاراماستان، ءبىزدىڭ ازاماتتار كومەك بەرىپ، دارىگەرلەرگە قولداۋ كورسەتۋدە. بۇل قۋانتارلىق جاعداي. دەمەك، شىعىسقازاقستاندىق نارىقتا دارى-دارمەك قورى جەتكىلىكتى. ءبىز ەلىمىزدە بولىپ جاتقان جاعدايدان ابىرويمەن شىعاتىنىمىزعا سەنەمىن، - دەدى تاۋارلار مەن كورسەتىلەتىن قىزمەتتەر ساپاسىن باقىلاۋ دەپارتامەنتىنىڭ فارماسيەۆتيكالىق ءبولىمى باسشىسىنىڭ ورىنباسارى نۇرگۇل قۇناپيانوۆا.
شقو اقپارات ورتالىعى
پىكىر قالدىرۋ