مالايزيانىڭ ەكس-پرەمەرى نادجيب رازاكقا سوت جەمقورلىق جاسادى، مەملەكەتتىك ينفەستيسيالىق قور قارجىسىن جىمقىردى دەگەن ايىپپەن 12 جىلعا تۇرمەگە قاماۋ تۋرالى ۇكىم شىعاردى، دەپ جازادى holanews.

نادجيب رازاكقا كوررۋپسيا، قىزمەتىن اسىرا پايدالانۋ، 1MDB قورىنىڭ كومەگىمەن اقشا جىمقىرۋ دەرەگى بويىنشا 42 ايىپ تاعىلىپ وتىر. وعان 49،3 ميلليون دوللار ايىپپۇل تولەۋگە مىندەتتەلدى.

ەكس-شەنەۋنىك اپپەلياسيالىق شاعىم قارالىپ جاتقاندا ۋاقىتشا بوستاندىقتا بولادى. ول ۇلكەن سومادا كەپىل اقشا تولەپ، ەكى اپتادا ءبىر رەت پوليسياعا بەلگىلەنىپ تۇرۋعا ءتيىس.

تەرگەۋ بارىسىندا انىقتالعان دەرەككە سايكەس، ايىپتالۋشى قور قارجىسىن ۇكىمەت مۇشەلەرىن ساتىپ الۋعا، ءوزىنىڭ استىرتىن قورلارىن قارجىلاندىرۋعا، قىمبات بۇيىمدار، كارتينالار، جىلجىمايتىن مۇلىك ساتىپ الۋعا جۇمساعان.

اقش بيلىگى ايىپتالۋشى ينۆەستيسيالىق قوردان 4،5 ميلليارد دوللاردى ياحتا، ونەر بۇيىمدارى مەن ليۋكس ساناتتاعى جىلجىمايتىن مۇلىك ساتىپ الۋعا قۇرتقان دەپ جوبالايدى.

ال ەكس-شەنەۋنىڭكتىڭ ءوزى تاعىلعان ايىپتاۋدىڭ بارلىعىن تەرىستەپ وتىر. سوزىنشە، ەشقانداي زاڭسىز وپەراسيا تۋرالى بىلمەيدى.

نادجيب رازاكتىڭ قىزى دانيار نازاربايەۆقا تۇرمىسقا شىققان. دانيار نازاربايەۆ قازاقستان ەكس-پرەزيدەنتىنىڭ ءىنىسى بولات نازاربايەۆتىڭ بۇرىنعى ايەلى مايرا قۇرمانعالييەۆانىڭ ۇلى.

نادجيب رازاك Reuters-كە بەرگەن سۇحباتىندا ءۇيىن ءتىنتۋ كەزىندە تابىلعان 300 قوراپ قىمبات بۇيىمدار مەن سومكەلەر وزدەرىنە سىيلىققا بەرىلگەنىن، ونىڭ كوبىن كۇيەۋ بالاسى دانيار نازاربايەۆ سىيلاعانىن ايتقان.