بەلسەندى رۋسلان جانپەيىسوۆ ءبىر جىلعا باس بوستاندىعىنان ايىرىلدى. بۇل تۋرالى شىمكەنت قالالىق سوتىنىڭ باسپا ءسوز قىزمەتى حابارلادى.
جانپەيىسوۆكە ۇكىم بۇگىن شىعارىلعان. قالالىق سوتتىڭ باسپا ءسوز قىزمەتى تاراتقان حابارلاماعا قارعاندا ول جابىرلەنۋشىگە اۋىرلىعى ورتاشا دەنە جاراقاتىن قاساقانا كەلتىرگەنى، سونداي-اق بيلىك وكىلىن قورلاعانى جانە تەلەكوممۋنيكاسيا جەلىسىندە بەينەجازبا تاراتقانى ءۇشىن كىنالى دەپ تانىلعان.
سوت ۇكىمىنە ساي، ول قاۋىپسىزدىگى بارىنشا تومەن قىلمىستىق-اتقارۋ جۇيەسى مەكەمەلەرىنىڭ بىرىندە جازاسىن وتەيدى.
بۇعان قوسا، سوت تالاپكەر-جابىرلەنۋشىلەردىڭ تالاپ ارىزدارىن قاناعاتتاندىرىپ، جانپەيىسوۆتان 550 مىڭ تەڭگە ءوندىرىپ الدى.
"سوت ءىستى قاراۋ كەزىندە سوتتالعان ادامنىڭ اەروزولدى بۇرىشپەن زاريادتالعان تاپانشا تۇرىندەگى اەروزولدى قۇرىلعىنى قولدانا وتىرىپ، جابىرلەنۋشىنىڭ كوز ايماعىنا وق اتقانىن، سوڭعىسىنا ەكى كوزدىڭ حيميالىق كۇيىگىن كەلتىرگەنىن، بۇل كورۋ وتكىرلىگىنىڭ تومەندەۋىنە اكەپ سوقتىرعانىن انىقتادى. سونىمەن قاتار، ول قوعامدىق ورىندا ءوزىنىڭ قىزمەتتىك مىندەتتەرىن اتقارۋ كەزىندە جۇرگەن پوليسيا قىزمەتكەرى ك.-نى كوپشىلىك الدىندا قورلادى جانە كوپشىلىككە قولجەتىمدى ينتەرنەت ارناعا بەينەجازبا جاريالادى" دەلىنگەن سوت حابارلاماسىندا.
سوت حابارلاماسىندا جانپەيىسوۆ وزىنە تاعىلعان "قاساقانا دەنە جاراقاتىن كەلتىردى" دەپ ايىپتى مويىنداماعىن ايتىلادى.
شىمكەنت قالاسىنىڭ تۇرعىنى رۋسلان جانپەيىسوۆ – پوليسيا قىزمەتكەرلەرىنىڭ جۇمىسىن سىنعا الىپ ۆيدەو تۇسىرەتىن بەلسەندى بلوگەر. ول بۇعان دەيىن دە بىرنەشە رەت قامالعان.
سوڭعى رەت جانپەيىسوۆ بيىل 14 ساۋىردە اكىمشىلىك قۇقىق بۇزۋشىلىق ءۇشىن 25 تاۋلىككە قاماۋعا الىندى. كەيىن قاماۋعا الۋ مەرزىمى 40 كۇنگە دەيىن ۇزارتىلعان.
كەيىن بەلسەندى بوستاندىققا شىعىپ، پوليسيا قىزمەتكەرلەرىن ۆيدەوعا تۇسىرمەۋگە ۋادە بەرگەن ەدى.
پىكىر قالدىرۋ