دەنساۋلىق ساقتاۋ مينيسترلىگى COVID-19 بويىنشا جاڭارتىلعان ستاتيستيكانىڭ العاشقى ناتيجەلەرىن حابارلادى.
"2020 جىلدىڭ 1 تامىزىنداعى جاعداي بويىنشا، COVID-19 زەرتحانالىق راستالعان جاعدايلاردىڭ سانى – 1226، سوڭعى ءبىر تاۋلىكتە 36 ادام قايتىس بولدى. انىقتالماعان ەتيولوگياسى بار، ءبىراق كوروناۆيرۋستىق ينفەكسيانىڭ كلينيكالىق جانە ەپيدەميولوگيالىق بەلگىلەرى تابىلعان پنيەۆمونيامەن اۋىرعاندار سانى – 5181. وتكەن تاۋلىكتە پنيەۆمونيا دياگنوزىمەن 30 ءولىم جاعدايى تىركەلدى" دەلىنگەن مينيسترلىكتىڭ رەسمي وكىلى باعدات قوجاحمەتوۆ facebook-تە جاريالانعان رەسمي اقپاراتتىق حابارلامادا.
قازاقستاندا 18 شىلدەدەن باستاپ ستاتيستيكالىق دەرەكتەردى ەسەپكە الۋ مەن قالىپتاستىرۋدىڭ جاڭا تاسىلدەرى ايقىندالعان. مينيسترلىكتەگىلەر بۇنى COVID-19 جانە پنيەۆمونيا جاعدايلارى بويىنشا دەرەكتەردىڭ بارىنشا اشىقتىعىن قامتاماسىز ەتۋ ماقساتىندا قولعا الىنعانىن مالىمدەدى.
بۇعان دەيىن دۇنيەجۇزىلىك دەنساۋلىق ساقتاۋ ۇيىمى، شەتەل جانە قازاقستان عالىمدارى ەلدە ورشىگەن پنيەۆمونيانىڭ ءىس جۇزىندە كوروناۆيرۋس ەكەنىن ءمالىم ەتكەن.
ارتىنشا پرەزيدەنت ستاتيستيكانى رەتكە كەلتىرۋدى تاپسىرىپ، مينيسترلىك جوعارىداعىداي شەشىمگە كەلگەن.
رەسمي دەرەك بويىنشا ەلدە كوروناۆيرۋس انىقتالعان العاشقى كۇننەن بۇگىنگە دەيىن 91 593 ادام ۆيرۋس جۇقتىرعان. ونىڭ 60825ء-ى جازىلىپ شىقسا، 793 ادام قايتىس بولعان.
پىكىر قالدىرۋ