قايىرىمدىلىق جاساپ، قايىرىن كورگەن ەرىكتىلەردىڭ ىلكىمدى ءىسى ەرلىكپەن تەڭ. جاقسىلىق جاساۋعا جارالعان جانداردىڭ قاتارىندا كەگەندىك ەرىكتىلەر دە بار.

1 مىڭ 200 جاسى بار الماتى وبلىسى كەگەن اۋدانىنىڭ ەرىكتىلەرى 2 وتباسىنا باسپانا كىلتىن سىيلاپ، قۋانىشقا بولەدى. اۋداندىق ورتالىق اۋرۋحاناعا وكپەنى جاساندى جەلدەتەتىن 7 اپپارات الىپ بەردى. اۋداننىڭ ەرىكتىلەرىنىڭ قاتىسۋىمەن "BIZ BIRGEMIZ"،  "مەيىرىمدى جەتىسۋ" اكسياسى اياسىندا وسى ۋاقىتقا دەيىن  300-دەن اسا ءتۇرلى الەۋمەتتىك اكسيالار ۋاقتىلى وتكىزىلۋدە. اتاپ ايتقاندا 3 مىڭ از قامتىلعان، كوپبالالى، ەرەكشە قامقورلىق قاجەت ەتەتىن وتباسىلارىنا دەمەۋشىلەردىڭ كومەگىمەن ازىق-تۇلىك بەرىلدى. "كەمەدەگىنىڭ جانى ءبىر" دەمەكشى، وسىنداي قيىن قىستاۋ كەزەڭدە ءوز قولدارىمەن مەديسنالىق بەتپەردە تىككەن جانسايا ەسبوسىنوۆا، مەرۋەرت نۇرعازييەۆا، اقەركە قوجامبەك، ءمولدىر سارسەنوۆالار تالاي جاسقا ۇلگى بولدى.

كەگەندىك ەرىكتىلەردىڭ ماقساتى ايقىن. ولار بابا جولىن جالعاپ، قايىرىمدىلىق جاساۋدان ەش جالىقپايدى.

ايدار قالييەۆ