اقورداعا كىرمەك بولعان بەلسەندى جانبولات ماماي مەن ونىڭ جاقتاستارىن پوليسيا ۇستاپ الىپ كەتتى.

دەموكراتيالىق پارتيا قۇرۋ بويىنشا باستاماشىل توپ جەتەكشىسى جانبولات ماماي پاندەميا كەزىندە حالىقتىڭ تۇرمىسى تومەندەپ، الەۋمەتتىك جاعدايى ناشارلاعانىن ايتىپ، وسىدان بىرنەشە اي بۇرىن بىررەتتىك نەسيە امنيستياسىن وتكىزۋ باستاماسىن كوتەرگەن. باستامانى ەل بويىنشا 100 مىڭعا جۋىق ادام قولداعان.

قوعام بەلسەندىسى 4 تامىز ساعات 11:00-دە اقورداعا 100 مىڭ ادامنىڭ ارىزىن تاپسىرۋعا باراتىنىن بىرنەشە كۇن بۇرىن حابارلاعان. ماماي مەن ونىڭ جاقتاستارى كەشە نۇر-سۇلتان قالاسىنا كەلگەن.

بۇگىن اقوردا الدىنا جينالعان قوعام بەلسەندىلەرىن پوليسيا قىزمەتكەرلەرى كارانتين بولعاندىقتان اقورداعا كىرگىزبەيتىنىن ءمالىم ەتىپ، قۇجاتتارىن تاپسىرىپ، وزدەرىنە تاراۋىن سۇرادى.

جانبولات ماماي قۇجاتتى جەكە ءوزى اقورداعا كىرىپ تاپسىراتىنىن، تارامايتىنىن ايتقان سوڭ پوليسيا ولاردى قارسىلىق تانىتتى دەپ ۇستاپ، كولىككە سالىپ الىپ كەتتى.

جانبولات ماماي ون جىلدان استام ۋاقىتتان بەرى بيلىكتى وتكىر سىناپ كەلە جاتقان بەلسەندى. جاڭاوزەن وقيعاسىنان كەيىن "الەۋمەتتىك ارازدىقتى قوزدىردى" دەگەن ايىپپەن تۇتقىندالعان. ارتىنشا "شىن وكىنۋىنە بايلانىستى قىلمىستىق جاۋاپتىلىقتان بوساتۋ" بابى بويىنشا بوساپ شىققان.

بەلسەندى كەيىن دە بيلىكتى سىناۋىن توقتاتقان ەمەس. ۇنەمى بيلىككە قارسى ميتينگىلەرگە شىعىپ، رەجيمنىڭ اۋىسۋىن تالاپ ەتىپ ءجۇر.

2019 جىلدىڭ كۇزىندە دەموكراتيالىق پارتيا قۇراتىنىن مالىمدەگەن. پارتيانىڭ قۇرىلتايىن وتكىزگەلى جاتقانىندا جاقتاستارى تۇتقىندالىپ، قۇرىلتاي ورنىنا بيلىككە قارسى بەيبىت ميتينگ وتكىزگەن.

P.S. قازاقستانداعى ميتينگىلەردىڭ باسىم كوپشىلىگى وسىنداي سەناريي بويىنشا وتەدى. ۇلتتىق قوعامدىق سەنىم كەڭەسىنىڭ باستاماسىمەن ميتينگى تۋرالى جاڭا زاڭ قابىلدانعانىنا قاراماستان، ويىن بەيبىت تۇردە بىلدىرۋگە شىققان ازاماتتاردى ۇستاۋ، قاماۋ ءالى توقتاعان جوق. سوندىقتان قامشى پورتالى ساناۋلى ساعاتتان كەيىن بولاتىن وقيعانىڭ وسىلاي ءوربيتىنىن بولجاپ وتىر.