قازاقستان H5N8 ءقاۋىپتى ۆيرۋسى بەلگىلەرىنىڭ تابىلۋىنا بايلانىستى رەسەيدەن تاسىمالداناتىن كەيبىر تاۋىق ونىمدەرىنە شەكتەۋ قويدى، دەپ حابارلادى اۋىل شارۋاشىلىعى مينيسترلىگى.

"3-4 تامىزدا ۆەتەرينارلىق جانە فيتوسانيتارلىق قاداعالاۋ بويىنشا فەدەرالدى قىزمەتتىڭ چەليابينسكىدەگى باسقارماسى ايماقتا انىقتالعان قۇس تۇماۋى ۆيرۋسىنىڭ گەنەتيكالىق بەلگىلەرى تۋرالى اقپارات تاراتتى. ءولى قۇستاردان الىنعان بارلىق سىنامادا H5N8 تۇماۋى ۆيرۋسىنىڭ كىشى ءتۇرى انىقتالدى.

قۇستاردىڭ بارلىق ءتۇرى تۇماۋدى تەز قابىلدايتىنى بەلگىلى. بۇل – اۋىل شارۋاشىلىق، سينانتروپتى جانە جابايى قۇستارعا جىلدام جۇعاتىن ءارى لەزدە تارايتىن ۆيرۋستىق اۋرۋ. سوندىقتان، قۇس تۇماۋىنىڭ جاپپاي تارالىپ كەتۋ ءقاۋپى بار.

وسىعان بايلانىستى ۋۆەل اۋدانارالىق ۆەتەرينارلىق زەرتحاناسى، چەليابى سىناق زەرتحاناسى جانە ۆلاديمير قالاسىنداعى جانۋارلاردىڭ دەنساۋلىعىن ساقتاۋ فەدەرالدى ورتالىعى جاساعان دياگنوز نەگىزىندە قازاقستان اۋماعىندا ەپيزووتيكالىق تالاپتاردى ساقتاۋ ماقساتىندا اۋىل شارۋاشىلىعى مينيسترلىگىنىڭ ۆەتەرينارلىق باقىلاۋ جانە قاداعالاۋ كوميتەتى 2020 جىلدىڭ 4 تامىزىنان باستاپ چەليابينسك وبلىسىنان تەرميالىق وڭدەۋدەن وتپەگەن قۇستارعا ارنالعان جەمشوپ قوسپالارى (حيميالىق جانە ميكروبيولوگيالىق سينتەزدىڭ قوسپالارىنان باسقا)، تاكسيدەرميالىق وڭدەۋدەن وتپەگەن اۋلانعان ولجالار (ءتىرى قۇستار، جۇمىرتقالار، قۇس ەتى جانە قۇس ەتىنىڭ بارلىق تۇرلەرى)، سونىمەن قاتار قۇستاردى ۇستاۋعا، سويۋعا جانە كەسۋگە قولدانىلاتىن قۇرال-جابدىقتار اكەلۋگە جانە تاسىمالداۋعا ۋاقىتشا شەكتەۋ ەنگىزدى.

شەكارالاس ايماقتارداعى ەپيزووتيالىق جاعدايدى وبلىستاردىڭ ۆەتەرينارلىق قىزمەتى ەرەكشە باقىلاۋعا الدى" دەلىنگەن مينيسترلىك تاراتقان حابارلامادا