بيىل قۇربان ايت مەيرامى 31 شىلدە مەن 1-2 تامىز كۇندەرىنە ءتۇستى. قاسيەتتى مەيرامدا تۇرعىنداردى شىعىس قازاقستان وبلىسىنىڭ اكىمى دانيال احمەتوۆ قۇتتىقتادى.

– قۇربان ايت ەلىمىزدەگى بارشا ۇلتتار مەن ۇلىستاردى بىرلىك پەن ىنتىماققا ۇندەپ، تاتۋلىق پەن بەيبىتشىلىكتىڭ مەرەكەسىنە اينالدى. ول – ءوزارا ىزگىلىك پەن مەيىرىمدىلىك سياقتى ادامي قۇندىلىقتاردى دارىپتەيتىن قاسيەتتى مەيرام. بۇل كۇندەرى ءار مۇسىلمان تۋعان-تۋىستارى مەن باۋىرىنا قامقورلىق كورسەتىپ، مۇقتاج جاندارعا قول ۇشىن سوزىپ، ءوزىنىڭ رۋحاني كەمەلدەنۋىنە ەرەكشە ءمان بەرەدى. قاسيەتتى مەرەكەدە بارشاڭىزعا زور دەنساۋلىق، وتباسىلارىڭىزعا اماندىق، باق-بەرەكە تىلەيمىن، – دەدى ايماق باسشىسى الەۋمەتتىك جەلىدەگى پاراقشاسىندا.

كوروناۆيرۋس پاندەمياسىنا بايلانىستى مەيرام ونلاين فورماتتا ءوتتى. قمبد قۇرباندىقتى ونلاين شالۋ ءۇشىن Qurban2020.kz سايتىن ىسكە قوستى. وبلىستاعى ارنايى الاڭداردا سايت ارقىلى قۇرباندىققا تاپسىرىس بەرۋشىلەردىڭ مالدارى تاڭەرتەننەن بەرى سويىلۋدا.

قۇرباندىق شالۋ ءراسىمى فوتو مەن ۆيدەوعا ءتۇسىرىلىپ، تاپسىرىس بەرۋشىلەرگە ەسەپ بەرىلەدى. بۇل ورىنداردا بارلىق سانيتارلىق-ەپيدەميولوگيالىق تالاپتار ساقتالادى. باس مەملەكەتتىك سانيتارلىق دارىگەردىڭ قۇربان ايتقا بايلانىستى قابىلداعان قاۋلىسىنا سايكەس تاۋارلار مەن كورسەتىلەتىن قىزمەتتەر ساپاسىن باقىلاۋ دەپارتامەنتىنىڭ وكىلدەرى مەن پوليسيا بولىمدەرىنىڭ قىزمەتكەرلەرى بازارلار مەن اۆتوكولىكتەردى باقىلاۋدا ۇستاپ وتىر.

«حاليفا التاي» شقو مەشىتىنىڭ نايب يمامى قانات داۋلبايەۆ، قۇرباندىققا شالىناتىن مالدى قانداي كريتەرييلەر بويىنشا تاڭداۋ كەرەكتىگىن ايتىپ بەردى.

– قۇربان ايت مەيرامىندا مالدىڭ ءتورت ءتۇرىن قۇرباندىققا شالۋعا بولادى. ماسەلەن جاستان اسقان قويدى سويۋعا رۇقسات ەتىلەدى. سونداي-اق ەكى جاسقا تولعان ءىرى قارا مەن بەس جاستاعى تۇيەنى قۇرباندىققا شالۋعا بولادى، - دەدى قانات داۋلبايەۆ.

مىسالى، وسكەمەن ءوڭىرى بويىنشا قازىرگى ساتتە قۇرباندىق شالۋعا 50 تاپسىرىس تۇسكەن. بۇدان بولەك 200-دەن استام مۇقتاج وتباسىلار ءوتىنىش قالدىرعان. قاسيەتتى كۇنى ۆولونتەرلار مۇقتاج جاندارعا مەرەكەلىك كوڭىل كۇي سىيلاپ، ولارعا قۇرباندىققا شالىنعان مالدىڭ ەتىن جەتكىزىپ بەرۋدە. ال سەمەي ءوڭىرى بويىنشا 106 قوي مەن 10 ءىرى قارا مال قۇرباندىق شالىنىپ، تاراتىلدى.

ايتا كەتەيىك، شىعىس قازاقستان وبلىسى بويىنشا قۇرباندىق شالۋعا 672 ادام ءوتىنىش بىلدىرگەن. ونىڭ ىشىندە 438ء-ىن ۆولونتەرلار تاراتىپ بەردى.

قمدب-نىڭ شقو، وسكەمەن ءوڭىرى بويىنشا باس يمامى ەرمەك قاجى مۇحاتاي شىعىسقازاقستاندىقتاردى مەيراممەن قۇتتىقتاپ، ءوڭىر تۇرعىندارىن ادام كوپ جەردە جينالماۋعا شاقىردى.

– بارلىق قازاقستاندىقتارعا جاقسىلىق پەن اماندىق تىلەيمىن. ءتاڭىرىم، شالعان قۇرباندارىڭىزبەن دۇعالارىڭىزدى قابىل ەتسىن. بيىل قۇربان ايت كاراتين جاعدايىندا وتۋدە. الايدا بۇل بىزگە جاقسىلىق جاساۋعا كەدەرگى كەلتىرمەيدى. مەرەكەلىك دۇعا جاسالماسا دا، ءبىزدىڭ ازاماتتار ونلاين رەجيمدە قۇرباندىق شالا الادى. كارانتين تالاپتارىن ساقتاپ، ۇيدە وتىرىڭىزدار، - دەدى ەرمەك قاجى مۇحاتاي.