قۇربان ايت مەرەكەسىنە وراي ءۇرجار اۋدانىنداعى قابانباي اۋىلىنىڭ تۋماسى، الماتىداعى تۋريستىك فيرمانىڭ بەلدى قىزمەتكەرى تولەۋجان مۇرات قىزى عالييەۆا 250 باس ۇساق مالدى قۇرباندىققا شالدى.
قۇرباندىققا شالىنعان مالدىڭ ەتتەرى قابانباي مەن قارابۇلاق اۋىلىندارىندا تۇراتىن الەۋمەتتىك جاعىنان از قامتىلعان جانە كوپبالالى وتباسىلارعا، سونداي-اق مۇمكىندىگى شەكتەۋلى جاندار مەن جالعىزباستى ادامدارعا تاراتىلدى. وعان اۋىل تۇرعىندارى ءدان ريزا.
ايتا كەتەيىك، تولەۋجان مۇرات قىزىنىڭ قولداۋىمەن قابانباي اۋىلىنداعى 250 جانە قارابۇلاق اۋىلىنداعى 30 وتباسىنا كومەك كورسەتىلدى.
بۇل يگى ىستەن ءۇرجار اۋدانىنداعى كولدەنەڭ اۋىلىندا قۇرىلعان "يۋبيلەينىي" ءجشس-نىڭ باسشىسى مامىربەك قاراشيەۆ تا شەت قالمادى. ول
تۇيەنى قۇرباندىققا شالىپ، 100 وتباسىعا 700 كەلى ەت ۇلەستىرىپ بەردى. ونىڭ ىشىندە الەۋمەتتىك از قامتىلعان وتباسىلار مەن زەينەتكەرلەر، سونىمەن قاتار مۇقتاج جاندار دا بار.

قۇربان ايتتا جەرلەستەرىن نازاردان تىس قالدىرماي، كومەك كورسەتكەن مامىربەك باقتىعازىۇلىنا جەرلەستەرىنىڭ ايتار العىسى زور.
ايتا كەتەيىك، قۇربان ايت كۇللى مۇسىلمان قاۋىمى اسىعا كۇتەتىن ۇلىق مەرەكە. بۇل تاتۋلىق پەن باۋىرمالدىققا ۇندەيتىن مەيرام ەكەنىن اتاپ وتكەن ورىندى.
شىعىس قازاقستان وبلىسىنىڭ جۇرتشىلىعى كەشەلى بەرى ونلاين قۇرباندىق شالىپ، يگى ىستەر مەن ساۋاپتى امالداردى  جۇزەگە اسىرىپ جاتىر.