بەرەل قورىمى شىعىس قازاقستان وبلىسى كاتونقاراعاي اۋدانى بۇقتىرما وزەنىنىڭ ون جاعالاۋىندا ورنالاسقان. 

مىڭجىلدىقتار تاريحىن ارقالاعان بەرەل قورىمى – قازاقستاننىڭ جالپىۇلتتىق كيەلى ورىندارى قاتارىنا ەنگەن قاسيەتتى مەكەن. قۇندى جادىگەرلەر مەن وبالار تاريح قويناۋىنان سىر شەرتىپ، ارحەولوگيالار زەرتتەۋلەردىڭ اينىماس ورتالىعىنا اينالدى.

وبالاردى جۇيەلى تۇردە زەرتتەۋ زەينوللا ساماشيەۆتىڭ ەسىمىمەن تىكەلەي بايلانىستى. ونىڭ باسشىلىعىمەن جۇرگىزىلگەن قازبا جۇمىستاردىڭ ناتيجەسىندە 1998-1999 جىلدارى قولدان جاسالعان ماڭگى مۇزدىقتاعى № 11 «پاتشا قورعانىنان» ساق كوسەمى مەن ايەلدىڭ جانە ەر توقىمىمەن بىرگە جەرلەنگەن 13 جىلقىنىڭ مۇردەسى تابىلدى، وعان قوسا پاتشانىڭ سالتانات كيىمى، ءمىنىس اتتاردىڭ ات ابزەلدەرى، اعاشتان، بىلعارىدان، كيىزدەن اڭ ستيلىندە جاسالعان مىڭنان استام قولونەر جادىگەرلەرى تابىلدى. كەيىنىرەك تاعى دا ماڭگى توڭ باسقان ەكى قورعان زەرتتەلىپ، ولاردان دا جەرلەنگەن جىلقىلاردىڭ مۇردەلەرى تابىلدى.

2016 جىلى وبلىس اكىمى دانيال احمەتوۆ­ءتىڭ باستاماسىمەن ارحەولوگيا سالا­سىندا عىلىمي-زەرت­تەۋ جۇمىستارىن دامىتۋ باعدارلاماسى قابىل­دانعان بولاتىن. باعدارلامانىڭ نەگىزگى ماقساتى - ءوڭىر­ءدىڭ تۋريستىك باعىتىن دامىتۋ ءۇشىن مادەني برەندىن قا­لىپ­تاس­تىرۋ، الەمدىك يۋنەسكو قورىن تولىقتىرۋ.

ايماق باسشىسى دانيال احمەتوۆتىڭ تىكەلەي تاپسىرماسىمەن قۇندى جادىگەرلەردى كەلۋشىلەردىڭ كورۋىنە مۇمكىندىك جاساۋ ءۇشىن قورعاننىڭ ۇستىنەن شىنى ساركوفاگ تۇرعىزىلدى.  قاتتى شىنىدان جاسالعان ساركوفاگتىڭ اۋماعى 90 شارشى مەتر، ال بيىكتىگى جادىگەرلەر جاتقان جەردەن باستاپ 8،5 مەتردى قۇرايدى. اشىق اسپان استىنداعى مۇراجايدى اشۋ – وبلىس ءۇشىن ماڭىزدى مادەني قۇبىلىس بولدى.