دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆ قازاقستاندا قانشا ادامعا كوروناۆيرۋسقا قارسى تەگىن ۆاكسينا سالىناتىنىن مالىمدەدى.

ونىڭ سوزىنشە، قازاقستان GAVI، CEPI، دۇنيەجۇزىلىك دەنساۋلىق ساقتاۋ ۇيىمى مەن حالىقارالىق كورپوراسيالار جانە ۆاكسينا وندىرۋشىلەرى بىرلەسە ازىرلەگەن "COVAX Facility" باعدارلاماسىنا ەنگەن.

باعدارلاما قۇرامىنداعى ەلدەرگە حالقىنىڭ 20 پايىزىنا ۆاكسيناسيا جاساۋعا مۇمكىندىك بەرىلەدى.

قازاقستاندا سوزىلمالى سىرقاتتارمەن اۋىراتىندارعا، جۇرەك-قان تامىرلارى سىرقاتىنا شالدىققان 65 جاستان اسقان ازاماتتارعا، قانت ديابەتى مەن وكپەنىڭ سوزىلمالى دەرتىنە شالدىققاندار مەن مەديسينا قىزمەتكەرلەرىنە جالپى جيىنتىعى 2 182 000 ادامعا ۆاكسيناسيا تەگىن جاسالادى.

GAVI دەرەگى بويىنشا، تابىس دەڭگەيى ورتاشا ەلدەر ءۇشىن كۆي-گە قارسى ۆاكسينانىڭ ءبىر دوزاسى 10-20 دوللار اراسىندا بولادى. بۇعان جەتكىزۋ شىعىنى كىرمەيدى. قازاقستان ۆاليۋتاسىمەن دوزا باعاسى 4142 تەڭگە مەن 8284 تەڭگە ارالىعىندا.

ەگەر ۆاكسينا GAVI ۇيىمى ارقىلى ساتىپ الىناتىن بولسا، ۆاكسيناعا شامامەن 9 ملن تەڭگەدەن 18 ملن تەڭگەگە دەيىن قارجى قاجەت.

دەنساۋلىق ساقتاۋ مينيسترلىگى تەگىن ۆاكسيناسياعا ىلىنەتىن ازاماتتار سانىن ارتتىرۋ جولدارىن قاراستىرىپ جاتىر.