قازاقستاندا 17 تامىزى مەن 3 قازان ارالىعىندا وتەتىن پرايمەريز سايلاۋى جوعارى وقۋ ورىندارىنداعى دوكتورانتتار مەن ماگيسترانتتارعا ارنايى كۋرس رەتىندە ەنگىزىلۋى مۇمكىن. بۇل تۋرالى ل.ن.گۋميليەۆ اتىنداعى جۋرناليستيكا جانە ساياساتتانۋ كافەدراسىنىڭ پروفەسسورى ناتاليا كالاشنيكوۆا قحا وكىلدەرىنىڭ قاتىسۋىمەن وتكەن Zoom-كونفەرەنسيادا ءمالىم ەتتى.

– دوكتارانتتار مەن ماگيسترانتتارعا پرايمەريز ناتيجەلەرى نەگىزىندە ارنايى كۋرس ەنگىزەمىز. پرايمەريز سايلاۋى تۋرالى كۋرس ەنگىزۋ وتە ماڭىزدى، سەبەبى، ساياسي مادەنيەت بولاشاق ساياساتتانۋشىلار ءۇشىن وتە قاجەت. ءبىز كافەدرا باسشىسىمەن كەلىسسوزدەر جۇرگىزدىك. ارنايى كۋرس دوكتورانتتار ءۇشىن، مۇمكىن بولسا ماگيسترانتتار ءۇشىن دە ەنگىزىلەدى. ولاردىڭ ديسسەرتاسيالىق، دوكتورلىق تاقىرىپتارى قازاقستانداعى جاڭا سايلاۋ تەحنولوگياسىنا ارنالاتىنىنا كۇمان جوق، – دەدى ول.

ناتاليا كالاشنيكوۆانىڭ شاكىرتتەرى ءقازىردىڭ وزىندە ەكى بلوكقا ءبولىنىپ، الدا بولاتىن پرايمەريزگە وزىندىك ۇلەسىن قوسۋدا.

– مەنىڭ ماگيسترانت جانە دوكتورانت شاكىرتتەرىم ءقازىر ەكى بلوكقا ءبولىندى. ءبىرىنشى بلوك – پرايمەريزدىڭ ناسيحاتىن جاساۋشى ساياساتتانۋشىلار، ال ەكىنشىسى – پرايمەريزگە قاتىسۋشى ۇمىتكەرلەر. قازىرگى جاستاردىڭ قابىلەتىن پرايمەريزدە بارىنشا پايدالانۋىمىز قاجەت. پارتيا ىشىندەگى ىرىكتەۋ باستالعانعا دەيىن ءبىز كوممۋنيكاسيانى كۇشەيتىپ، الەۋمەتتىك جەلىلەر ارقىلى جاستارىمىزدى ەرەكشە شاراعا اتسالىسۋعا شابىتتاندىرۋىمىز كەرەك، – دەدى ناتاليا پاۆلوۆنا.

Zoom-كونفەرەنسيادا پرايمەريزدىڭ ماڭىزى تۋرالى ايتقان اسسامبلەيا وكىلدەرىنىڭ ءبىرى دميتريي كورەپانوۆ الداعى سايلاۋعا ءوتىنىش بەرگەنىن ايتتى. "اۋىل – مەملەكەت تىرەگى" جوباسىنىڭ نەگىزىن قالاۋشى كورەپانوۆ ەلدەگى ازاماتتار، ونىڭ ىشىندە اۋىل تۇرعىندارى جاڭا ساياسي تۇلعاعا مۇقتاج ەكەندەرىن جاسىرمادى.

– پرايمەريز قازاقستان ساياسي جۇيەسى دامۋىنىڭ جاڭا كەزەڭى. ەلىمىزدەگى ازاماتتىق قوعامعا، ونىڭ ىشىندە اۋىل تۇرعىندارىنا جاڭا ساياسي تۇلعالار، جاڭاشا فورمات قاجەت. پاندەميا كەزىندە ەلدەگى عانا ەمەس، الەمدەگى احۋال ناشارلاپ كەتتى. سوندىقتان بۇل شاراعا جاستار عانا ەمەس، تاجىريبەسى بار، ەلدى داعدارىستىق جاعدايدان شىعارا الاتىن ازاماتتاردى قاتىستىرۋ كەرەك سياقتى. مەن پرايمەريزگە قاتىسۋعا ءوتىنىش بەردىم. قازىرگى تاڭدا بۇل شاراعا دايىندالىپ، ءوز باعدارلامامدى جاساپ جاتىرمىن، – دەدى ول.