كەشە ق ر پرەمەر-مينيسترى اسقار ءماميننىڭ توراعالىعىمەن وتكەن مەملەكەتتىك كوميسسيا وتىرىسىندا قالىپتاسقان ەپيدەميولوگيالىق جاعدايدى ەسكەرە وتىرىپ، كارانتين شارالارىن كەزەڭ-كەزەڭىمەن الىپ تاستاۋ جوسپارى قارالدى.
وسىعان بايلانىستى نۇر-سۇلتان قالاسى دەرماتولوگيا ورتالىعىنىڭ ديرەكتورى، مەديسينا عىلىمدارىنىڭ دوكتورى جۇلدىز دانبايەۆا شەكتەۋ شارالارىن جەڭىلدەتۋدەن ەشقانداي قورقىنىش جوق ەكەنىن ايتتى.
– ءقازىر ەلدەگى ەپيدەميولوگيالىق جاعداي تۇراقتالدى. سىرقاتتانۋشىلار سانى دا ازايىپ كەلەدى. حالىق سانيتاريالىق نورمالاردى ورىنداپ، ماسكا تاعۋ رەجيمىن ساقتاپ، الەۋمەتتىك قاشىقتىقتى ۇستانسا، شەكتەۋ شارالارىن جەڭىلدەتۋدەن ەشقانداي قورقىنىش جوق. شەت مەملەكەتتەردە دە وسى ەرەجەلەردى ساقتاپ، كارانتيندى بىرتىندەپ جەڭىلدەتىپ جاتىر. ول ءبىر جاعىنان حالىقتىڭ سانا-سەزىمىنە بايلانىستى. ىندەتتىڭ تارالۋ دەڭگەيى قوعامنىڭ ءاربىر مۇشەسىنىڭ ارەكەتىنە، ءار قادامىنا تىكەلەي بايلانىستى، – دەيدى ول.
ايتا كەتۋ كەرەك، مەملەكەتتىك كوميسسيا 2020 جىلدىڭ 17 تامىزىنان باستاپ بارلىق وڭىردە جۇمىسىن قايتا باستايتىن كاسىپكەرلىك سۋبەكتىلەرى قىزمەت تۇرلەرىنىڭ تىزبەسىن بەكىتتى.
پىكىر قالدىرۋ