الماتى قالاسىنىڭ باس مەملەكەتتىك سانيتار دارىگەرى جانداربەك بەكشين رەسپۋبليكا بويىنشا كارانتين رەجيمى قالاي جەڭىلدەتىلەتىنىن ايتتى.

بەكشيننىڭ سوزىنشە، جۇمىس كۇندەرى قالاداعى قوعامدىق تاماقتانۋ ورىندارى تاڭعى ساعات 9.00-دەن 22.00-گە دەيىن جۇمىس ىستەيدى. ال دەمالىس جانە مەيرام كۇندەرى ساعات 10.00-23.00 اراسىندا اشىق بولادى.

– كوپتەگەن قوعامدىق تاماقتانۋ ورىندارى كوپقاباتتى ۇيلەردىڭ ءبىرىنشى قاباتىندا ورنالاسقان. جەكە ورنالاسقان تاماقتانۋ ورىندارىنىڭ حالىققا ەشقانداي زيانى تيمەسە، جۇمىس ۋاقىتىن ءبىر ساعاتقا كوتەرۋگە مۇمكىندىك بار. وسىنى قاراستىرىپ، ءبىر شەشىمگە كەلەمىز، –دەدى قالانىڭ باس سانيتار دارىگەرى.

ول قالاداعى كاسىپورىنداردىڭ جۇمىسى توقتاتىلمايتىن، ول جەردە سانيتارلىق تالاپتار ساقتالاتىنىن ايتتى.

– قوعامدىق تاماقتانۋ نىساندارىنىڭ كۇندىز كەلۋشىلەردى قابىلداۋ ەرەجەسى بار. ولار تولىمدىلىعى 50%-عا دەيىن قابىلداي الادى. ۇستەلدەردىڭ اراسىندا ەكى مەتر اراقاشىقتىق بولۋى كەرەك، ال ەندى ورىندىقتار اراسى 60 سانتيمەتردەن كەم بولماۋى كەرەك. تاماقتانۋ ورىندارىنىڭ قىزمەتكەرلەرى بەتپەردە مەن قولعاپ كيىپ ءجۇرۋى كەرەك. سونداي-اق قوعامدىق ەكراندار قويىلادى، – دەدى جانداربەك بەكشين.