قازاقستاننىڭ ەكس-پرەزيدەنتى نۇرسۇلتان نازاربايەۆتىڭ جيەنى ايسۇلتان راحاتتىڭ دۇنيەدەن وتۋىنە بايلانىستى نازاربايەۆتار اۋلەتىنىڭ كەيبىر مۇشەلەرى الەۋمەتتىك جەلىدە جازبا جاريالادى.

قارالى حابار شىققاننان كەيىن بىرنەشە ساعات وتكەندە نازاربايەۆ قورىنىڭ الەۋمەتتىك جەلىدەگى پاراقشاسىندا ايسۇلتاننىڭ اناسى، سەناتتىڭ ەكس-سپيكەرى داريعا نازاربايەۆا ۇلىنىڭ دۇنيەدەن وزۋىنا بايلانىستى پىكىر ءبىلدىردى.

"ءبىزدىڭ وتباسىمىز سۇيىكتى ايسۇلتانىمىزدىڭ دۇنيەدەن وزعانىنا بايلانىستى قايعىرىپ جاتىر. وسى قارالى كەزەڭدە حالىق بۇل ورنى تولماس قازاعا تۇسىنىستىگى مەن ادەپتىلىگىن تانىتادى دەپ سەنەمىز" دەلىنگەن جازبادا.

17 تامىزدا ايسۇلتاننىڭ اعاسى ءنۇرالي راحات الەۋمەتتىك جەلىدەگى پاراقشاسىندا باۋىرى ەكەۋىنىڭ بالا كەزدە تۇسكەن سۋرەتتەرىنەن ۆيدەوجازبا جاريالادى.

– قىمباتتى باۋىرىم، ءقازىر مەنىڭ قانداي حالدە ەكەنىمدى سوزبەن ايتىپ جەتكىزۋ مۇمكىن ەمەس. ساعان كوپ دۇنيەنى ايتقىم كەلدى. كوپ نارسە ايتىلماي قالدى. سەن مەنىڭ جادىمدا ماڭگىلىك قالاسىڭ. سەنى ۇنەمى جاقسى كورەتىن بولامىن. ايتەۋىر جانىڭ جاي تاپسىنشى! – دەپ جازدى.

17 تامىز كۇنى نۇرسۇلتان نازاربايەۆتىڭ كەنجە قىزى ءاليا نازاربايەۆا الەۋمەتتىك جەلىدە وتباسىنداعى قايعىعا كوڭىل ايتىپ جاتقاندارعا العىسىن ءبىلدىردى.

"قۇرمەتتى دوستار، مەنىڭ وتباسىممەن بىرگە قايعىرىپ، كوڭىل ايتىپ جاتقاندارىڭىزعا ءوز العىسىمدى بىلدىرەمىن. اللا سىزدەرگە مۇنداي قايعى بەرمەسىن دەپ تىلەيمىن. بالالارىڭىز تەك جانىڭىزدا بولسىن!" دەلىنگەن الەۋمەتتىك جەلىدەگى پاراقشاسىندا.