تىكەلەي ەفير بارىسىندا شقو اكىمى دانيال احمەتوۆ 2020-2021 وقۋ جىلىندا قاي مەكتەپتەر قاراپايىم رەجيمدە وقىتۋ جۇيەسىنە جۇمىسقا كىرىسەتىنىن ءمالىم ەتتى.
بيىلعى وقۋ جىلىندا بارلىق مەكتەپتەگى وقۋشىلار قاشىقتىقتان ءبىلىم الادى. وقۋ بارىسىندا وتكەن جىلعى ءتورتىنشى توقسانداعى تاجىريبە ەسكەرىلەتىن بولادى. الايدا شاعىن كومپلەكتىلى جانە ورىن سانى جەتكىلىكسىز مەكتەپتەردە اتالمىش جۇيە قولدانىلمايدى. وسىلايشا، جالپى ورتا ءبىلىم بەرەتىن 334 مەكتەپ وقۋشىلارعا ەسىگىن ايقارا اشىپ، شتاتتىق رەجيمدە جۇمىس ىستەيتىن بولادى.
ايماق باسشىسى، اتالعان مەكتەپتەردە ءبىلىم الاتىن وقۋشىلار ەكى اۋىسىمدا وقيتىنىن ءمالىم ەتتى. ءاربىر ساباقتان سوڭ جارتى ساعات بويى جەلدەتۋ جانە دەزينفەكسيالاۋ جۇمىستارى جۇرگىزىلەتىن بولادى. سونداي-اق بەتپەردە (ماسكا) كيۋ رەجيمى مەن مەديسينالىق باقىلاۋ كۇشەيتىلەدى.
ايتا كەتەيىك، بۇگىنگى كۇنى بارلىق مەكتەپ دەزينفەكسيالىق قۇرالدارمەن جانە سانيتارلىق قاۋىپسىزدىك قۇرالدارىمەن قامتاماسىز ەتىلدى. ونىڭ ىشىندە تەپلوۆيزور، سانيتايزەر، كىرەبەرىستەگى قورعانىس كىلەمدەرى مەن باكتەريستىك شامدار بار. ال بالالارعا تەگىن بەتپەردەلەر (ماسكالار) بەرىلەدى.
پىكىر قالدىرۋ