پرەزيدەنت قاسىم-جومارت توقايەۆ جەمقورلىق جاساعان اكىمدەرگە قاتىستى پىكىر ءبىلدىردى. بۇل تۋرالى اقوردا سايتى حابارلادى.

– سىبايلاس جەمقورلىققا قارسى كۇرەس – ەلىمىزدىڭ ستراتەگيالىق دامۋىنداعى نەگىزگى باسىمدىقتاردىڭ ءبىرى. بۇل – مەنىڭ بەرىك ۇستانىمىم جانە سايلاۋالدى باعدارلامادا حالىققا بەرگەن ۋادەم. وسى جۇمىستا ەشقانداي كوزبوياۋشىلىققا، "بارماق باستى، كوز قىستى" ارەكەتتەرگە جول بەرىلمەۋگە ءتيىس. تالاپ قاتاڭ بولادى. بىلتىرعى جيىندا ءبىز ناقتى ءىس-قيمىل جوسپارىن ايقىندادىق. بۇگىندە ءبىرقاتار ماقساتتى جۇزەگە اسىردىق. قازاقستان بەدەلدى حالىقارالىق گرەكو ۇيىمىنا، ياعني سىبايلاس جەمقورلىققا قارسى مەملەكەتتەر توبىنا مۇشە بولدى. نورماتيۆتىك اكتىلەردى سىبايلاس جەمقورلىققا قارسى ساراپتامادان وتكىزۋ ينستيتۋتىنىڭ جۇمىسى جاڭعىردى، – دەدى مەملەكەت باسشىسى.

توقايەۆ قول استىنداعىلاردىڭ جەمقورلىق ارەكەتتەرى ءۇشىن باسشىلارىن قىزمەتىنەن بوساتۋ قاعيداتى ەنگىزىلگەنىن اتاپ ءوتتى.

– سىبايلاس جەمقورلىق جاعدايلارىنىڭ سانى ءالى دە ازايماي تۇر. وتكەن جىلمەن سالىستىرعاندا جەمقورلىق ارەكەتتەرى ءۇشىن جاۋاپقا تارتىلعان ادامداردىڭ سانى 11 پايىزعا ارتقان. اشىعىن ايتقاندا، ءقازىر كۇندەلىكتى جاڭالىقتاردان ءتۇرلى دەڭگەيدەگى شەنەۋنىكتەردىڭ سىبايلاس جەمقورلىققا بايلانىستى زاڭ بۇزۋشىلىقتارى ءۇشىن ۇستالىپ جاتقانى تۋرالى وقيتىن بولدىق. شەنەۋنىكتەردىڭ ىشىندە ەكى وبلىس اكىمى دە بار. مۇنىڭ ءوزى "وتە ءقاۋىپتى سيمپتوم"، – دەدى ول.

2020 جىلى 7 ايدىڭ قورىتىندىسى بويىنشا سىبايلاس جەمقورلىق ءۇشىن قىلمىستىق جاۋاپقا تارتىلعانداردىڭ سانى 912 ادامدى قۇرادى. بۇل وتكەن جىلدىڭ تۋرا وسى كەزەڭىمەن سالىستىرعاندا 11 پروسەنتكە ارتىق. وتكەن جىلى 820 ادام بولعان.

– پاندەميا كەزەڭىندە جانە مەملەكەت پەن ازاماتتارىمىزدىڭ تابىسى ازايعان تۇستا جەمقورلىقپەن كۇرەستى ودان ءارى كۇشەيتۋىمىز كەرەك. حالىقارالىق ساراپشىلاردىڭ ايتۋى بويىنشا مەملەكەتتەر پاندەميانىڭ سالدارىمەن كۇرەسكە مول قاراجات جۇمساپ جاتقان كەزدە قارجىنى ماقساتقا ساي پايدالانباۋ جانە جىمقىرۋ ءقاۋپى ارتا تۇسەدى. ءبولىنىپ جاتقان قاراجات مۇقيات ءارى ءتيىمدى جۇمسالۋعا ءتيىس. بۇل – ءار تەڭگە ءوزىنىڭ ماقساتىنا ساي جۇمسالۋى كەرەك دەگەن ءسوز. اسىرەسە، قازىرگى جاعدايدا ەش پايداسى جوق جانە قاجەتسىز ءىس-شارالارعا قاراجاتتىڭ شىعىندالۋىنا قوعامنىڭ قالاي قارايتىنىن كورىپ وتىرمىز. سوندىقتان، مۇنداي ماسەلەلەرگە  بولارى بولىپ، بوياۋى سىڭگەننەن كەيىن ەمەس، الدىن الا ءمان بەرۋ – وتە ماڭىزدى، – دەپ پرەزيدەنت ءسوزىن تۇيىندەدى.