جاڭا كوستيۋم، تۋفلي مەن شاش ۇلگىسىن ءبىرىنشى قىركۇيەككە دايىندايدى. بيىل ءداستۇرلى تۇردە سالتاناتتى جيىن بولماسا دا، باستاۋىش سىنىپ ءمۇعالىمى دينارا جامانبالينوۆا ادەتتەگىدەي جاڭا وقۋ جىلىنا دايىندالادى. ول وقۋشىلارمەن قاشىقتىقتان تانىسىپ، بەينەقوڭىراۋ ارقىلى بالالارمەن ءتىل تابىسادى.
– وقۋشىلاردىڭ ءتىزىمىن الدىم. ءاربىر بالانىڭ قاي بالاباقشاعا بارعانىن جانە كىمنىڭ قانداي قىزىعۋشىلىعى بارىن انىقتادىم. سونىمەن قاتار وقۋشىلاردىڭ وسى كۇنگە دەيىن قول جەتكىزگەن جەتىستىكتەرىمەن تانىسىپ، جاڭا لايفحاك ويلاپ تاپتىم. لايفحاك بويىنشا بالالار مەنىمەن بەينە قوڭىراۋ ارقىلى تىلدەسكەن ساتتە اتى-جوندەرىن قاعازعا جازىپ قوياتىن بولادى، - دەدى دينارا ەرلان قىزى. – بۇل جاي عانا دۇنيە بولىپ كورىنگەنىمەن، ءبىرىنشى سىنىپ تابالدىرىعىن اتتاعالى تۇرعان ءبۇلدىرشىن ءۇشىن وتە ماڭىزدى. ارينە، كەيىن بالالاردىڭ ءاتى-جونىن جاتتاپ العان سوڭ ولار بۇل قاعازداردى قولدانبايتىن بولادى. الايدا العاشقى ونلاين ساباقتا وسى ءادىستى قولدانامىز.
ءبىرىنشى سىنىپقا باراتىن بالالاردىڭ ءبارى ءۇي جاعدايىندا ءبىلىم المايدى. اتا-انالاردىڭ ءوتىنىشى بويىنشا كەزەكشى سىنىپتار جۇمىس ىستەيدى. وندا 15 ادامنان ارتىق ادام بولمايدى. بالالار بارلىق قاۋىپسىزدىك شارالارىن ساقتاپ، مەكتەپكە كەلە الادى. ءقازىر پەداگوگتار ونلاين رەجيمنەن بولەك، شتاتتىق رەجيمدە ءبىلىم بەرۋ ءۇشىن ساباق كەستەسىن ىڭعايلاستىرۋدا.
– ءتورتىنشى توقسانمەن سالىستىرعاندا، وسى جولى مەكتەپ ۇجىمى مەن اكىمشىلىگىنە وسى باعىتتا ساباق بەرۋگە دايىندالۋعا ۋاقىت بولدى، – دەدى «دارىندى بالالارعا ارنالعان مامانداندىرىلعان ۆالەولوگيالىق مەكتەپ» ديرەكتورى ناتاليا احايەۆا. – بيىلعى وقۋ جىلىندا مەكتەپكە جوندەۋ جۇمىستارىن جۇرگىزىپ، جيھازدار مەن تەحنيكالاردى اۋىستىرىپ قانا قويماي، جاڭا وقىتۋ جۇيەسىن پىسىقتاپ ۇلگەردىك. جاز بويى پەداگوگتار ۆەبينارلار، ترەنينگەرگە، كونفەرەنسيالارعا قاتىسىپ، بىلىمدەرىن شىڭدادى. بارلىعى پاندەميا كەزىندەگى دۇرىس وقىتۋدىڭ ماڭىزى زور ەكەنىن ءبىر كىسىدەي تۇسىنەدى. مەن شقو ءبىلىم باسقارماسىنىڭ اتقارعان زور جۇمىسى ۇلكەن ناتيجە بەرەتىنىنە سەنەمىن. ويتكەنى، ەندى مۇعالىمدەر جاڭا وقۋ فورماسىنا دايىن، - دەدى ناتاليا ۆاسيليەۆنا.
ەندى كىتاپ پەن داپتەردىڭ ورنىنا وقۋشىلار ءۇشىن سمارتفون مەن كومپيۋتەردىڭ بولۋى وتە ماڭىزدى. مۇعالىمدەردىڭ كومەگى ارقىلى بالالار ارنايى باعدارلامانى جازىپ، سول بويىنشا ءۇي تاپسىرماسىن ورىنداپ، ءبىلىم الادى. تاپسىرمانى دۇرىس ورىنداۋدان بولەك، دەدلايندى ساقتاۋ ماڭىزدى ەكەنىن ايتا كەتكەن ورىندى. ءاربىر ساباق بويىنشا بەرىلگەن تاپسىرمانى ورىنداۋعا رەگلامەنت بەلگىلەنەدى. كەيىن سول بويىنشا بالالارعا باعا قويىلادى. سوندىقتان قاشىقتىقتان وقۋ بارىسىندا بوساڭسۋعا بولمايدى.
مەكتەپ پسيحولوگى مارينا زاجيگينانىڭ ايتۋىنشا، بالانىڭ باقىلاۋسىز قالىپ، بوساڭسۋىنا جول بەرمەي، ونىڭ وقۋعا دەگەن جاۋاپكەرشىلىگىن ارتتىرۋ كەرەك.
– كلاسستىڭ ورتاق چاتىندا ءاربىر بالامەن جەكە سويلەسۋ قاجەت. بالالار ساعات 8.15 بايلانىسقا شىعۋى كەرەك. ونلاين ساباق بارىسىندا ءاربىر بالامەن جۇمىس جاسالادى. ەگەر وقۋشى ءپاندى وقىتۋ كەزىندە بارلىعىن تۇسىنسە، + بەلگىسىن قويۋ ءتيىس. بۇل بالالارعا ولاردىڭ ءاردايىم باقىلاۋدا ەكەنىن ۇعىنۋعا مۇمكىندىك بەرەدى، - دەدى مارينا زاجيگينا.
وسىنداي ءادىس-تاسىلدى پەداگوگ ماماندار، ءبىلىم سالاسىنىڭ شەنەۋىكتەرى مەن اكىمشىلىگى ورتاق چاتتاردى قولدانادى. مۇعالىمدەر دە بالالار سياقتى قاشىقتىقتان وقىتۋ جاڭا ءادىس بولعاندىقتان، ماماندارعا اتا-انالاردىڭ قولداۋى قاجەت. ولاردىڭ ەسكەرتۋلەرى مەن ۇسىنىستارى پەداگوگيكالىق جينالىستاردا تالقىلانىپ، ونلاين وقىتۋدى ءتيىستى وتكىزۋگە سەپتىگىن تيگىزەدى.
