ورالدا 12 جاستاعى قىزدى زورلاعان پەدوفيلگە 2،5 جىل باس بوستاندىعىن شەكتەۋ جازاسى كەسىلدى. بۇل تۋرالى كتك حابارلادى.

پەدوفيلگە ەكى جارىم جىل باس بوستاندىعىنان شەكتەۋ جازاسى القا بيلەرىنىڭ جاسىرىن داۋىس بەرۋ ارقىلى انىقتالعان.

– ءبىز سول شەشىمدى قابىلداعان القا بيلەردى كورگىمىز كەلەدى. ول القا بيلەر قۇرامىن كىم جاساقتاعان؟ ولاردىڭ قۇقىق سالاسىنان حابارى بار ما؟ "قىز جىنىستىق قاتىناسقا ءوز كەلىسىمىن بەردى" دەپتى. ول كامەلەتكە تولماعان 12 جاستاعى بالا! ءمۇنداي جەڭىلدىك جاساۋدىڭ ارتى ونسىز دا قاپتاپ كەتكەن پەدوفيلدەرگە ەركىندىك بەرەدى. ءىستىڭ قايتا قارالۋىن تالاپ ەتەمىز، – دەدى "قازاقستان ايەلدەر كۇشى" اليانسى ءتوراعاسىنىڭ ورىنباسارى ءازيزا شۇجەيەۆا.

21 جاستاعى كۇدىكتى اناتوليي مارچەنكو قىلمىسىن تولىق مويىنداعان. الايدا جىنىستىق قاتىناسقا 12 جاستاعى قىز "ءوز كەلىسىمىن بەردى" دەپ ايتتى. وسىلايشا پەدوفيلگە القا بيلەرى  2 جارىم جىلعا باس بوستاندىعىن شەكتەۋ جازاسىن عانا بەرىپتى. 

دەگەنمەن قوعام بەلسەندىلەرى مۇنىڭ شەكتەن شىققان دۇنيە ەكەنىن ايتىپ، جوعارعى سوتقا دەيىن ارىزدانعان. سۋديا القا بيلەرىنىڭ ايتقانىنان شىعۋعا قۇزىرەتى جوعىن جەتكىزدى.

– سۋديا القا بيلەرىنىڭ شەشىمىنە ىقپال جاساي المايدى. القا بيلەرى  باس بوستاندىعىنان ايىرۋعا "نەگىز جوق" دەپ سوتتالۋشىعا باس بوستاندىعىنان ايىرماۋ جازاسىن تاعايىنداۋدى ادىلەتتى دەپ سانادى. ۇكىم زاڭدى كۇشىنە ەنگەن جوق، – دەدى سۋديا شارا زاينۋللينا.