ءماجىلىس دەپۋتاتى باقىتبەك سماعۇل الماتى وبلىسىنداعى «بايانكول» شەكارالىق زاستاۆاسىنا بارىپ، شەكاراشىلاردىڭ تۇرمىس-تىرشىلىگىمەن تانىستى.

باقىتبەك سماعۇلدىڭ ايتۋىنشا، كومانديرلەر تۇراتىن ەسكى ۇيلەرگە جوندەۋ جۇرگىزىلىپ، ال قاتارداعى جاۋىنگەرلەرگە ارنالعان ۇيلەردىڭ قابىرعالارىن جىلۋ وقشاۋلاعىش ماتەريالدارمەن قاپتاپ، استىنا ىرگەتاس قۇيىپ، قىستا جىلى، جازدا سالقىن، ونىڭ ۇستىنە الىستان كورىنبەيتىن، جاسىرىن، ۇقىپتى باسپانالار دايىندالۋدا.

سونىمەن قاتار، ساپار بارىسىندا باقىتبەك سماعۇل رايىمبەك اۋدانى حالقىمەن كەزدەسىپ، اۋدان ورتالىعىندا بوي كوتەرگەن جاڭا عيماراتتاردى جانە قازىرگى كەزدە قىزۋ جۇمىستار جۇرگىزىلىپ جاتقان قۇرىلىس الاڭدارىنا باردى.

قازىرگى ۋاقىتتا اۋدان ورتالىعى نارىنقول اۋىلىندا بيىل جەرگىلىكتى تۇرعىندارعا ارنالعان 83 تۇرعىن ءۇي سالىنۋدا. ال، مەملەكەتتىك قىزمەتكەرلەر يگىلىگىنە 4 قىزمەتتىك تۇرعىن ءۇي تاپسىرىلماق.

سونداي-اق، باقىتبەك سماعۇل «جۇمىسپەن قامتۋ جول كارتاسى» نەگىزىندە قىزىلشەكارا اۋىلىنىڭ اۋىز سۋ جۇيەسىن قايتا جاڭعىرتۋعا جانە نارىنقول، جاڭا-تەكەس اۋىلدارىندا كوشەلەردى جارىقتاندىرۋ جۇمىستارى باستالعانىنا ەرەكشە نازار اۋداردى.

جاڭا اۋداننىڭ ينفراقۇرىلىمى دا جاڭعىرۋدا. ساپار اياسىندا باقىتبەك سماعۇل ونى دا باقىلاپ قايتتى. سونداي-اق، نارىنقول اۋدانىندا جەرگىلىكتى ماڭىزداعى جولدار دا جونگە كەلتىرىلىپ، جاڭادان توسەلۋدە.

سونىمەن قاتار، ءماجىلىس دەپۋتاتى باقىتبەك سماعۇل ءماجىلىستىڭ زاڭ شىعارۋشىلىق جۇمىسىندا ەسكەرۋى ءۇشىن حالىقتىڭ الەۋمەتتىك ماسەلەلەرىنە ەرەكشە نازار اۋداردى.