ءبىلىم جانە عىلىم ءمينيسترى اسحات ايماعامبەتوۆ 1 قىركۇيەكتە وقۋشىلار قاشىقتان قالاي وقيتىنىن ايتتى. بۇل تۋرالى ول ورتالىق كوممۋنيكاسيالار قىزمەتىندە وتكەن ونلاين بريفينگتە مالىمدەدى.

– وقۋ جىلى ەپيدەميولوگيالىق جاعدايعا بايلانىستى قاشىقتان وقۋ فورماتىندا بولادى. ەكى ەرەكشەلىك بار:

كەزەكشى سىنىپتاردىڭ جۇمىسى. 1–4 سىنىپتارعا بايلانىستى، اتا-انالاردىڭ ءوزىنىڭ دەربەس شەشىمى بولسا، وسىنداي كەزەكشى سىنىپتار ۇيىمداستىرىلاتىن بولادى.

شالعايداعى اۋىلدارداعى شاعىن جيناقتالعان مەكتەپتەر. ەپيدەميولوگيالىق احۋال جاقسى بولسا، ءداستۇرلى فورماتتا وقۋعا بولادى.

تامىز ايىنىڭ سوڭىنا قاراي دەرەكتەرگە سايكەس، جالپى وقۋشىلاردىڭ 80%-ى (2،6 ملن وقۋشى) قاشىقتان وقىتىلادى. 15%-ى (اتا-انالار وتىنىشتەرى بويىنشا) كەزەكشى سىنىپتارعا بارادى. بۇل دەگەن 530 مىڭ بالا جانە 5%-ى ءداستۇرلى فورماتتا وقيتىن بولادى. شاعىن جيناقتى مەكتەپتەردە وقيتىن بالالار سانى - 202 مىڭ بالا، – دەدى ايماعامبەتوۆ.

مينيستر قاشىقتان وقىتۋ بويىنشا ەكى نەگىزگى باعىتتى ايتتى.

– ارنايى ينتەرنەت-پلاتفورمالار ارقىلى وقىتۋ. پلاتفورمالاردىڭ ىڭعايىنا بايلانىستى مەكتەپتەر، قالالىق، اۋداندىق مەكتەپتەر ءبىلىم بولىمدەرى شەشىم قابىلدادى.

"ەل ارنا" جانە "بالاپان" تەلەارنالارى ارقىلى بەرىلەتىن تەلەساباقتار، ءقازىر 9 ساعاتقا دەيىن ەفير بەرىلىپ وتىر، – دەدى ول.

ول ءوز سوزىندە اتا-انالاردىڭ دەربەس شەشىمى بويىنشا كەزەكشى سىنىپتار ۇيىمداستىرىلاتىن بولاتىنىن اتاپ ءوتتى.

– ۇزىلىستەر ءار سىنىپ ءۇشىن ءار ءتۇرلى ۋاقىتتا بولادى. ساباق ۇزاقتىعى – 40 مينۋتقا دەيىن. بالالار ءبىر كابينەتتە وقىتىلادى. سىنىپتاردا دەزينفەكسيالىق شارالار جۇرگىزىلەتىن بولادى، – دەپ اتاپ ايتتى مينيستر.