ءبىلىم جانە عىلىم ءمينيسترى اسحات ايماعامبەتوۆ ورىنباسارىنىڭ ۇستالعانى تۋرالى اقپاراتقا پىكىر ءبىلدىردى. بۇل تۋرالى مينيستر ورتالىق كوممۋنيكاسيالار قىزمەتىنىنىڭ ونلاين بريفينگىندە حابارلادى.
بريفينگتە سۇراق قويعان ءجۋرناليستىڭ ايتۋىنشا، باق-تا 21 شىلدەدە انتيكوررۋپسيا قىزمەتى ءبىلىم جانە عىلىم مينيسترلىگىنىڭ جوعارى لاۋازىمدى تۇلعالارىنا قاتىستى تەرگەۋ باستالعانىن، مينيستر ورىنباسارى رۇستەم ءبيعاريدىڭ بيۋدجەتتەن بەس ميلليارد تەڭگە جىمقىرعانى جايلى اقپارات تاراعان.
– بۇل تۋرالى اقپاراتتى مەملەكەتتىك ورگاننىڭ وزىنەن بىلە الاسىز. وسى ۋاقىتقا دەيىن بىزگە رەسمي تۇردە حابارلاندىرۋ كەلمەدى. بۇعان بايلانىستى مەملەكەتتىك ورگانداردىڭ ءوزى جاۋاپ بەرسە، دۇرىس بولار ەدى، – دەدى مينيستر ونلاين بريفينگتە.
"ءسىزدىڭ ورىنباسارىڭىز رۇستەم بيعاري قايدا؟" دەگەن ءجۋرناليستىڭ سۇراعىنا:
– مەنىڭ بارلىق ورىنباسارلارىم جۇمىستا. رۇستەم بيعاري بۇل اقپاراتتى ەستىمەدى، ول جۇمىس ىستەپ ءجۇر. جالپى كىناسىزدىك پرەزۋمپسياسى بار دەپ ايتقىم كەلەدى. ارتىق بولجامدار ايتا المايمىز. راس مالىمەت شىققاندا، ول تۋرالى ايتاتىن بولامىز. قازىرگى تاڭدا بارلىق ارىپتەستەرىم جۇمىستا. مەنىڭ ورىنباسارىما قاتىستى سۇراقتار جايىندا رەسمي مالىمەت المادىق، – دەپ جاۋاپ بەردى مينيستر.
پىكىر قالدىرۋ