شقو-دا جوعالىپ كەتكەن 7 جاسار بالانىڭ ءمايىتى اۋىل ماڭىنان تابىلدى. بۇل تۋرالى وبلىستىڭ پوليسيا دەپارتامەنتى حابارلادى.

پوليسيا مەن ەرىكتىلەر التاي اۋدانى زۋبوۆسك اۋىلىندا 7 جاسار ەدۋاردتى ءبىر تاۋلىكتەن استام ىزدەدى. اتا-اناسىنىڭ ايتۋىنشا، بالاسى 29 تامىزدا ادەتتەگىدەي اۋلاعا ويناۋعا، ۆەلوسيپەد تەبۋگە شىققان. سودان ءبىراز ۋاقىتتان كەيىن جوعالىپ كەتكەنىن بىلگەن. كەيىننەن تۋىستارى بالانى وزدەرى ىزدەپ، تابا الماي، 30 تامىزدا پوليسيانىڭ كومەگىنە جۇگىنگەن.

"30-شى تامىزدا ىزدەستىرۋ جۇمىستارى توقتاتىلعان. بالانىڭ دەنەسى زۋبوۆسك اۋىلىنىڭ جانىنان تابىلعان. دەنەسىندە زورلىق-زومبىلىق بەلگىلەرى بار ەكەنى بەلگىلى بولدى. ءقازىر جاعدايدى پوليسيا وكىلدەرى انىقتاپ جاتىر" دەلىنگەن دەپارتامەنت حابارلاماسىندا.

ءتارتىپ ساقشىلارى كۇدىكتى رەتىندە زۋبوۆسك اۋىلىنىڭ 20 جاستاعى تۇرعىنىن ۇستادى. قازىرگى ۋاقىتتا قىلمىستىق كودەكستىڭ "ادام ءولتىرۋ" بابى بويىنشا سوتقا دەيىنگى تەرگەۋدى باستادى.

– تەرگەۋ بارىسىندا كۇدىكتى كىناسىن مويىنداپ، التاي اۋدانىنىڭ پوليسيا بولىمشەسىنىڭ ۋاقىتشا ۇستاۋ يزولياتورىنا قامالدى، – دەيدى شقو پوليسيا دەپارتامەنتىنىڭ باستىعى ساعات مادييەۆ.