پرەمەر-مينيستردىڭ ءبىرىنشى ورىنباسارى ءاليحان سمايىلوۆ پرەزيدەنت قاسىم-جومارت توقايەۆتىڭ جولداۋىندا ايتىلعان تاپسىرمالاردى جۇزەگە اسىرۋ ءۇشىن شامامەن 2 ترلن تەڭگە قاجەتتىگىن اتاپ ايتتى. بۇل تۋرالى ول ۇكىمەت وتىرىسىندا وتكەن بريفينگتە مالىمدەدى.

– جولداۋدا ايتىلعان پرەزيدەنتتىڭ تاپسىرمالارى ءتيىستى قارجىلىق قولداۋدى قاجەت ەتەدى. جولداۋدا ايتىلعان ءبىرقاتار تاپسىرمانى ورىنداۋ ءۇشىن بيىلعى رەسپۋبليكالىق بيۋدجەتتە بەلگىلى ءبىر سوما قاراستىرىلىپ قويعان. ماسەلەن، جاڭا 13 ينفەكسيالىق اۋرۋحانانىڭ قۇرىلىسىنا 30 ميلليارد تەڭگە كوزدەلگەن. ۇكىمەتتىڭ رەزەرۆىنەن الەۋمەتتىك جاعىنان وسال وتباسىلاردىڭ بالالارىنا كومپيۋتەرلىك جابدىقتار ساتىپ الۋعا ءقازىردىڭ وزىندە 70 ميلليارد تەڭگە ءبولىندى، – دەيدى ول.

ونىڭ ايتۋىنشا، قازىرگى ۋاقىتتا 2020 جىلعى بيۋدجەتتى ناقتىلاۋ اياسىندا وسى جىلدىڭ شىعىندارىن قوسىمشا قامتاماسىز ەتۋ بويىنشا جۇمىس جۇرگىزىلىپ جاتىر. اتاپ ايتقاندا، مەديسينا قىزمەتكەرلەرىنە قوسىمشا اقى تولەۋ، دارى-دارمەك ساتىپ الۋ جانە ت.ب. الدىن الا ەسەپتەۋ بويىنشا بيىل قوسىمشا قاجەتتىلىك 300 ميلليارد تەڭگەنى قۇرايدى.

– 2021 جىلدىڭ بيۋدجەتىندە پرەزيدەنتتىڭ جولداۋدا ايتقان تاپسىرمالارىن ورىنداۋعا 1،6 تريلليون تەڭگە قاراستىرىلىپ وتىر. بۇل قارجى ءبىرىنشى كەزەكتە، دارىگەرلەر مەن مۇعالىمدەردىڭ جالاقىسىن كوتەرۋگە، شوب كرەديتتەرىن سۋبسيديالاۋعا، رەسپۋبليكالىق جولداردى جوندەۋگە، "اۋىل – ەل بەسىگى" باعدارلاماسىن ىسكە اسىرۋعا جۇمسالادى. جەكەلەگەن تاپسىرمالار بويىنشا مەملەكەتتىك ورگاندارمەن بىرلەسىپ ءقازىر شىعىستار ناقتىلانۋدا. جولداۋدى ورىنداۋعا قاجەت قاراجات، نەگىزىنەن، بيۋدجەتتىڭ شىعىس بولىگىن وڭتايلاندىرۋ، كولەڭكەلى ەكونوميكانى ازايتۋ جۇمىسىنان تۇسەتىن تۇسىمدەر، سالىق سالۋ بازاسىن كەڭەيتۋ، جەكە ينۆەستسيالار جانە كاسىپكەرلىكتى دامىتۋ ەسەبىنەن قامتاماسىز ەتىلەدى، – دەپ اتاپ ءوتتى ءاليحان سمايىلوۆ.