2020 جىلعى 3 قىركۇيەكتە نيۋ-يوركتىڭ وڭتۇستىك وكرۋگتىك سوتى سوت ءوندىرىسىنىڭ ءتارتىبىن بۇزعانى ءۇشىن يلياس پەن ۆيكتور حراپۋنوۆتارعا قارسى ايىپپۇل سالۋ تۋرالى كەزەكتى قاۋلى شىعاردى. بۇل تۋرالى ادىلەت مينيسترلىگىنىڭ رەسمي سايى حابارلادى.
سۋديا كەترين پاركەر حراپۋنوۆتار كوپتەگەن زاڭدى مىندەتتەمەلەردى بۇزعان، دالەلدەمەلەردى ادەيى جويعان جانە كەيبىر دالەلدەمەلەردىڭ ءوز قولدارىندا جوقتىعى تۋرالى جالعان جاۋاپ بەرگەن دەگەن قورىتىندىعا كەلدى.
سونداي-اق سوت حراپۋنوۆتاردىڭ وسى ءىس بويىنشا كەيبىر سوت قاۋلىلارىن، سونىڭ ىشىندە يلياس حراپۋنوۆتىڭ قۇپيا ايعاقتاردى رۇقساتسىز تاراتۋعا سالىنعان تىيىمدى بۇزعاندىعىن انىقتادى.
3 قىركۇيەكتەگى شەشىم سوتتاردىڭ حراپۋنوۆتار مەن ابليازوۆقا قاتىستى قۇقىققا قايشى مىنەز-قۇلقى جانە سوت ءوندىرىسىنىڭ ءتارتىبىن بۇزعانى ءۇشىن ايىپپۇلدار تاعايىنداۋ تۋرالى ۇستىمىزدەگى جىلعى مامىر ايىندا جانە 2019 جىلعى شىلدە ايىندا شىعارىلعان قاۋلىلارى قاتارىنىڭ جالعاسى بولىپ تابىلادى. بۇل قاتارىنان ساناعاندا بەسىنشى شەشىم.
ايىپپۇلدىڭ ناقتى مولشەرى تالاپكەرلەردىڭ وزدەرى جۇمساعان سوت شىعىندارىنىڭ سوماسىن سوتقا ۇسىنعاننان كەيىن بەلگىلەنەدى.
قازاقستان رەسپۋبليكاسى ادىلەت مينيسترلىگى (الماتى ق. اكىمدىگىنىڭ اتىنان) "بتا بانك" اق-مەن (بۇدان ءارى - تالاپكەرلەر) بىرلەسىپ، ءتورت جىلدان استام ۋاقىت بۇرىن ابليازوۆتى، حراپۋنوۆتاردى جانە ولاردىڭ قىلمىستىق سىبايلاستارىن قازاقستاننان ۇرلانعان اقشانى اقش-تا جاراتتى دەگەن ايىپپەن نيۋ-يوركتاعى "Flatotel" سوت قاراۋىنا باستاماشىلىق جاساعان.
ابليازوۆ جالعان نەسيەلەر بەرۋ ارقىلى بتا-دان ميللياردتاعان دوللار ۇرلاعان. ول ءۇشىن ابليازوۆ قازاقستاندا سوتتالىپ، بىرىككەن كورولدىك سوتتارىندا كىنالى دەپ تانىلعان. اقش-تاعى سوت قاراۋلارى بارىسىندا تالاپكەرلەر ابليازوۆتىڭ قىلمىستارىن راستايتىن قوسىمشا ەلەۋلى دالەلدەمەلەردى جينادى، سونداي-اق وسى قىلمىستاردىڭ جاسالۋىن ءوز كوزىمەن كورگەن كوپتەگەن كۋالاردىڭ جاۋاپتارىن قامتاماسىز ەتتى.
ق ر ۇكىمەتىنىڭ كونسۋلتانتى – "Boies Schiller Flexner LLP" سەرىكتەسى مەتتيۋ شۆارس:
"تالاپكەرلەر ۇسىنىلىپ جاتقان دالەلدەمەلەرگە سوتتىڭ ءجىتى قاراۋىن جوعارى باعالايدى. ابليازوۆ، حراپۋنوۆتار جانە ولاردىڭ سىبايلاستارى سوت پروسەسىندە ادال نيەتپەن قاتىسۋدان بىرنەشە رەت باس تارتىپ، كوپتەگەن سوت قاۋلىلارىن بۇزعان. دالەلدەمەلەردىڭ ءبىر بولىگىن قاساقانا جويعاندىقتارىنا قاراماستان، ولاردىڭ جاسالعان قىلمىستارعا قاتىستىلىعىن راستايتىن قۇجاتتاردىڭ كولەمى جەتكىلىكتى. تالاپكەرلەر سول دالەلدەمەلەردى نيۋ-يورك القابيلەر سوتىنىڭ نازارىنا ۇسىنۋ مۇمكىندىگىن اسىعا كۇتۋدە" دەگەن مالىمدەمە جاسادى.
