وڭىرلىك كوممۋنيكاسيالار قىزمەتىنىڭ الاڭىنداعى ونلاين بريفينگ بارىسىندا الماتى قالالىق موبيلدىلىك باسقارما باسشىسىنىڭ ورىنباسارى ەرنۇر ابجاحان قالانىڭ جاڭادان قوسىلعان ۋچاسكەلەرىندەگى جول ينفراقۇرىلىمى قۇرىلىسى بويىنشا قالا اكىمى تاپسىرمالارىنىڭ ورىندالۋ بارىسى تۋرالى ايتتى.

«شەتكى اۋماقتار بويىنشا 200 كم جولدىڭ نەگىزگى بولىگى – بۇل شامامەن 50%-دان استامىنا ورتاشا جوندەۋ جۇرىگىزىلدى. ول الاتاۋ، ناۋرىزباي جانە بوستاندىق اۋداندارى. بۇرىن قاتتى جابىندى بولماعان شاعىن اۋدانداردا جوبالىق-سمەتالىق قۇجاتتارى ازىرلەنۋدە. اتالعان جسق جۇزەگە اسىرىلعاننان كەيىن شامامەن 111 كم جول پايدا بولادى»، — دەپ اتاپ ءوتتى سپيكەر.

9 اۋدان بويىنشا جسق ازىرلەۋ اياقتالىپ كەلە جاتقانى اتاپ ءوتىلدى.

جالپى اعىمداعى جىلى ۇزىندىعى 47،4 كم بولاتىن الماتى قالاسىنىڭ 177 كوشەسىندە جاڭا جولدار سالىنۋدا. ونىڭ ىشىندە ۇزىندىعى 18،6 كم بولاتىن 112 كوشە بويىنشا جول قۇرىلىسى اياقتالدى. جىل سوڭىنا دەيىن ۇزىندىعى 28،8 كم بولاتىن قالعان 65 كوشەنىڭ جولىن سالۋدى اياقتاۋ جوسپارلانۋدا.

جول ينفراقۇرىلىمىنىڭ ساپاسىنا قاتىستى سۇراقتار بويىنشا قالا تۇرعىندارى 1308 نومەرى بويىنشا Open Almaty قوعامدىق قابىلداۋعا جۇگىنە الادى، بولماسا الەۋمەتتىك جەلىلەردەگى الماتى قالاسىنىڭ قالالىق موبيلدىلىك باسقارماسىنىڭ اككاۋنتتارىنا حابارلاسۋعا بولادى.