الماتى قالاسىنىڭ اكىمى باقىتجان ساعىنتايەۆ «الماتى» تا-نىڭ Aكimat Live باعدارلاماسىندا وتكەن تىكەلەي ەفير بارىسىندا قالا تۇرعىندارىنىڭ سۇراقتارىنا جاۋاپ بەرە كەلىپ، ورتا جانە جوعارى وقۋ ورىندارى تۇلەكتەرىنىڭ جۇمىسقا ورنالاسۋ ماسەلەسىن شەشۋ تۋرالى اڭگىمەلەدى.

جاستار اراسىنداعى جۇمىسسىزدىقتىڭ باستى سەبەبى – ولاردىڭ العان بىلىمدەرىنىڭ بۇگىنگى نارىق تالاپتارىنا ساي كەلمەيتىندىگى. بۇل ماسەلە جۇيەلى وزگەرىستى قاجەت ەتەدى.

وسىعان وراي، وتكەن جىلى 9-11 سىنىپ وقۋشىلارىنا جۇمىسشى ماماندىقتارىن بەرەتىن ورتا ارنايى ءبىلىم سالاسىنا ساراپتاما جۇرگىزىلدى.

قالادا بارلىعى 80 كوللەدج بار، بيىلعى جىلعى تۇلەكتەر سانى شامامەن 16 مىڭ ادامدى قۇرايدى، ولاردىڭ ىشىندە 15 744 ادام نەمەسە 98،4%ء-ى جۇمىسقا تۇردى. بيىلعى جاڭا وقۋ جىلىندا قالا كوللەدجدەردەگى 11 219 ورىنعا مەملەكەتتىك تاپسىرىس بەردى.

«مۇندا قالانى دامىتۋ باعدارلاماسىن، ونىڭ ىشىندە الماتىنىڭ 2050 جىلعا دەيىنگى دامۋ ستراتەگياسىن ەسكەرە وتىرىپ، ماماندىقتار ءتىزىمى قايتا قارالدى. ناتيجەسىندە اعىمداعى جىلدىڭ تىزىمىندە اقپاراتتىق تەحنولوگيا، سەرۆيستى ەكونوميكا، قۇرىلىس سالالارىنا ەرەكشە نازار اۋدارىلدى»، — دەدى ب. ساعىنتايەۆ.

ەكونوميكالىق سالالار اياسىندا مەملەكەتتىك ءبىلىم بەرۋ تاپسىرىسىنىڭ قۇرىلىمى: IT-سالا، بايلانىس، تەلەكوممۋنيكاسيا – 2308 (20،6%)؛ قىزمەت كورسەتۋ، ەكونوميكا – 2289 (20،4%)؛ كولىك – 1800 (16%)؛ ەنەرگەتيكا، ماشينا جاساۋ – 1180 (10،5%)؛ قۇرىلىس – 1021 (9،1%)؛ تاماق ونەركاسىبى – 850 (7،6%)؛ ءبىلىم – 775 (6،5%)؛ مەديسينا – 391 (3،5%)؛ سيفرلى پوليگارفيا – 350 (3،1%)؛ تۋريزم – 200 (1،8%)؛ اۋىل شارۋاشىلىعى (ۆەتەرينارلىق مەديسينا، لاندشافت ديزاينى) – 100 (0،9%).

«جۇمىسشى ماماندىعىن ناسيحاتتاۋ جانە NEET ساناتىنداعى جاستاردى قالانىڭ ەكونوميكالىق ومىرىنە كەڭىنەن تارتۋ ءۇشىن بىلتىر ءبىز ادامدار كوپ جينالاتىن ورىنداردا "ءموبيلدى قابىلداۋ كوميسسيالارىن" قۇردىق. مۇنداي كوميسسيالار 5 بازاردىڭ، تەمىرجول ۆوكزالىنىڭ، 4 مەشىتتىڭ اۋماعىنا ورناتىلدى. قالانىڭ شامامەن 6 مىڭعا جۋىق جاس تۇرعىنى بۇلاردان وزدەرىنە قاجەتتى كەڭەستەردى الدى. كوللەدجدەرگە NEET ساناتىنداعى 500 ادام قابىلداندى. اعىمداعى جىلى كوروناۆيرۋس ىندەتىنە قاتىستى مقك-نىڭ جۇمىستارى ۋاقىتشا توقتاتىلدى»، — دەپ حابارلادى الماتى اكىمى.

بۇلاردان وزگە، دۋالدى ءبىلىم بەرۋ بويىنشا جۇمىستار جۇرۋدە. اعىمداعى جىلى ءدۋالدى ءبىلىم بەرۋ اياسىندا 308 كاسىپورىنمەن ءۇشجاقتى 3500 كەلىسىمگە قول قويىلدى.

بۇگىنگى تاڭدا قالا كوللەدجدەرىنىڭ بۇكىل وقۋ پروسەسى بىرتىندەپ وسى جۇيەگە كوشۋدە، ونىڭ نەگىزگى ماقساتى – جۇمىس بەرۋشىلەردىڭ تالاپتارى بويىنشا پراكتيكالىق باعىتتا ءبىلىم بەرۋ جانە كەيىن تۇلەكتەردى جۇمىسقا ورنالاستىرۋ. بۇل بولاشاقتا ورتا ارنايى ءبىلىم بەرەتىن وقۋ ورىندارىنىڭ تۇلەكتەرىن جۇمىسقا ورنالاستىرۋعا وڭ ىقپال ەتەتىن بولادى.

جوو-نىڭ تۇلەكتەرىنە كەلەتىن بولساق، بۇگىنگى تاڭدا جۇمىس تاجىريبەسى جوق جاس ماماندارعا ەڭبەك» باعدارلاماسى بويىنشا اقىلى جاستار پراكتيكاسى ۇسىنىلادى.

جاستار پراكتيكاسىنا وقۋ بىتىرگەن سوڭ ءۇش جىل قاتارىنان جۇمىسسىز جۇرگەن 29 جاسقا دەيىنگى جاستار جىبەرىلەدى. جاستار تاجىريبەسىنىڭ ۇزاقتىعى – 6 اي. ەڭبەككە اقى تولەۋ 69 450 تگ قۇرايدى (سالىقتار، مىندەتتى الەۋمەتتىك تولەمدەر، پايدالانىلماعان ەڭبەك دەمالىسى مەن بانك قىزمەتتەرىن قوسا ەسەپتەگەن تولەمدەر)، ونى اي سايىن جۇمىسپەن قامتۋ ورتالىعى جۇزەگە اسىرادى.