ءبىلىم جانە عىلىم ءمينيسترى اسحات ايماعامبەتوۆ الەۋمەتتىك جەلىدەگى پاراقشاسىندا ءبىلىم بەرۋ باعدارلامالارى تۋرالى جازبا جاريالادى.
"ءبىراز ۋاقىت پەداگوگيكالىق ماماندىقتار بويىنشا گرانت جەڭىپ، وقۋعا تۇسكەن تۇلەكتەردىڭ ورتاشا بالى 60-65 بولاتىن. بۇل رەتتە ەڭ تومەنگى شەكتى بالدىڭ 50 بولعانىن ەسكەرۋ قاجەت.
وعان قوسا، پەداگوگيكالىق ماماندىقتى تاڭداعانداردىڭ اراسىندا مەكتەپتى ۇزدىك بىتىرگەندەر نەمەسە «التىن بەلگى» يەگەرلەرى از بولدى. سونىمەن قاتار جىل سايىن جوو بىتىرەتىن 40 مىڭنان استام تۇلەكتىڭ تورتتەن ءبىرى عانا ءبىلىم بەرۋ مەكەمەلەرىنە ماماندىق بويىنشا جۇمىسقا ورنالاساتىن.
شىنتۋايتىن ايتقاندا، جاس مۇعالىمدەردىڭ بىلىكتىلىك دەڭگەيىنىڭ تومەندىگى ۋنيۆەرسيتتەردەگى ءبىلىمنىڭ ساپاسىزدىعىنا عانا ەمەس، سونىمەن قاتار مۇعالىمدىك قىزمەت تارتىمدىلىعىنىڭ تومەندىگىنە دە بايلانىستى. ارينە، بۇل اۋقامدى ماسەلە كەشەندى تۇردە شەشىلۋى ءتيىس. اتالعان باعىت بويىنشا جۇمىس جۇرگىزىلىپ جاتىر
قازىرگى ۋاقىتتا ءبىلىم بەرۋ باعدارلامالارىن جاڭارتىپ، پەداگوگيكالىق پراكتيكانى ۇيىمداستىرۋدىڭ جاڭا جۇيەسىن، دۋالدى وقىتۋ جۇيەسىن ەنگىزىپ جاتىرمىز. بۇدان بولەك ءمۇعالىم بولىپ جۇمىس ىستەۋگە كىرىسەتىن تۇلەكتەردىڭ دايىندىق دەڭگەيىن انىقتايتىن ارنايى ەمتيحان دا جەتىلدىرىلىپ جاتىر.
سونىمەن قاتار 2020 جىلى پەداگوگيكالىق ماماندىقتارعا ءتۇسۋ ءۇشىن ەڭ تومەنگى شەكتى بالل 70-كە دەيىن كوتەرىلدى. بيىل مەملەكەتتىك تاپسىرىس بويىنشا بولاشاق مۇعالىمدەردى دايىندايتىن جوو-عا قويىلاتىن تالاپتاردى دا كۇشەيتتىك. بۇعان دەيىن ولاردىڭ سانى 86 بولسا، ەندى كۇرت ازايىپ كەلەدى. ءبىز ءۇشىن باستى قاعيدا – سان ەمەس، ساپا جانە ءتيىستى جاعدايلاردىڭ جاسالۋى.
ءبىراق ءبىز تالاپتاردى كۇشەيتىپ قانا قويماي، ىنتالاندىرۋ ءۇشىن دە جاعداي جاساپ جاتىرمىز.
پرەزيدەنتتىڭ تاپسىرماسى بويىنشا 2020 جىلدىڭ قىركۇيەگىنەن باستاپ بولاشاق پەداگوگتەردىڭ ستيپەندياسى 42 000 تەڭگەگە دەيىن ءوستى. سالىستىرمالى تۇردە الساق، باسقا ماماندىقتار بويىنشا وقيتىن ستۋدەنتتەردىڭ ستيپەندياسى 26 مىڭ تەڭگەنى قۇرايدى.
بۇدان بولەك مۇعالىمدەردىڭ جالاقىسى ءقازىردىڭ وزىندە ۇلعايتىلدى جانە ول جىل سايىن 25% - عا ءوسىپ وتىرادى. سونداي-اق پەداگوگتەردى مىندەتىنە جاتپايتىن جۇمىسقا تارتۋدى بولدىرماۋ جانە ارتىق ەسەپتىلىكتەن ارىلتۋ بويىنشا شارالار قابىلدانىپ جاتىر.
مەملەكەتتىك تاپسىرىستى ورنالاستىرۋ جانە تۇلەكتەردى ماقساتتى دايارلاۋ ارقىلى گرانتتاردى ءبولۋ جۇيەسى دە وزگەرىپ جاتىر.
2021 جىلدان باستاپ بارلىق تۇلەك سەرتيفيكاتتاۋ راسىمىنەن ءوتۋى كەرەك. جۇمىسقا ورنالاسۋ كەزىندە باسەكەلەستىك بولۋى ءۇشىن كونكۋرس نەگىزىندە قابىلداۋ جۇيەسى ەنگىزىلىپ جاتىر.
ءبىراق ەڭ ماڭىزدى شارا «پەداگوگ مارتەبەسى تۋرالى» زاڭنىڭ قابىلدانۋى بولدى.
مىنە، وسىنىڭ ناتيجەسىندە ءبىز سوڭعى جىلى دارىندى جاستاردىڭ پەداگوگ ماماندىعىنا دەگەن قىزىعۋشىلىعىنىڭ ايتارلىقتاي ارتقانىن بايقادىق.
ماسەلەن، بيىل شەكتى بالل كوتەرىلدى. كونكۋرس ناتيجەسىنە سايكەس گرانت 8506 تۇلەككە تاعايىندالدى.
وقۋعا تۇسۋشىلەر اراسىندا «التىن بەلگى» يەگەرلەرىنىڭ قاتارى دا كوبەيگەن – 1565 ادام (گرانتقا يە بولعانداردىڭ جالپى سانىنىڭ شامامەن 20%-ى)، بۇل وتكەن جىلعى كورسەتكىشپەن سالىستىرعاندا 1،7 ەسە كوپ. جالپى پەداگوگيكالىق ماماندىقتار بويىنشا ورتاشا ۇپاي ايتارلىقتاي ءوستى.
بيىل «شەتەل ءتىلى مۇعالىمدەرىن دايارلاۋ» (شەكتى بالل – 104)، «ماتەماتيكا مۇعالىمدەرىن دايارلاۋ» (شەكتى بالل – 111)، «قازاق ءتىلى مەن ادەبيەتى مۇعالىمدەرىن دايارلاۋ» (شەكتى بالل – 107)، «پەداگوگيكا جانە پسيحولوگيا» (شەكتى بالل – 97)، «ارنايى پەداگوگيكا بويىنشا مامانداردى دايارلاۋ» (شەكتى بالل – 89) جانە ت.ب. باعىتتار بويىنشا ۇلكەن كونكۋرس بولدى.
ءبىز، ارينە، جالاقىنى كوتەرۋ جانە باسقا دا الەۋمەتتىك كەپىلدىكتەر مىندەتتى تۇردە پەداگوگتەرگە قويىلاتىن تالاپتاردى ارتتىرۋمەن دە ساي كەلۋى ءتيىس ەكەنىن تۇسىنەمىز.
وكىنىشتىسى، باسقا سالالارداعىداي جۇمىسىنا نەمقۇرايلى قارايتىن مۇعالىمدەر دە كەزدەسەدى. ونداي مامانداردىڭ ورنىنا قىزمەتىنە جاۋاپتى قارايتىن ارىپتەستەرىمىز كەلەتىن بولادى.
مەملەكەت باسشىسى قاسىم-جومارت كەمەل ۇلى ءوزىنىڭ جولداۋىندا ءححى عاسىردىڭ ۇرپاعى تەرەڭ ءبىلىمدى بولۋى كەرەكتىگىن، ال ءاربىر ءىستىڭ نەگىزىندە كاسىبيلىك بولۋ شارت ەكەنىن اتاپ ءوتتى.
ۇبت قورتىندىسىنىڭ جاقسى جاڭالىعى – بۇل پەداگوگ ماماندىعىنىڭ تۇلەكتەر اراسىندا، اسىرەسە مىقتى تالاپكەرلەردىڭ سۇرانىسىنا يە بولۋى. بۇل – ەڭبەكتىڭ زايا كەتپەگەنىنىڭ دالەلى.
جاڭا زاڭ ءقازىردىڭ وزىندە العاشقى جەمىسىن بەرىپ جاتىر، قاتارىمىزعا ارىپتەس رەتىندە مىقتى تۇلعالاردىڭ كەلەتىنىنە سەنىمدىمىن" دەلىنگەن ءمينيستردىڭ الەۋمەتتىك جەلىدەگى جازباسىندا.
