اقش پرەزيدەنتىنىڭ بۇرىنعى زاڭگەرى مايكل كوەننىڭ سوزىنە قاراعاندا، دونالد ترامپ ءوزىن ءنىسىلشىل مافيا سياقتى ۇستايدى جانە "بارلىق قارا ناسىلدىلەرگە پىكىرى ناشار". بۇل تۋرالى BBC حابارلادى.

بۇل ايىپتاۋلار كوەننىڭ "ساتقىندىق: ەستەلىك" كىتابىنان الىنعان. ول كىتابىن باسقا دا قىلمىستارمەن قاتار، ترامپتىڭ سايلاۋالدى كامپانياسىن قارجىلاندىرۋ ەرەجەلەرىن بۇزعان قىلمىسى ءۇشىن جازاسىن وتەپ جاتقان كەزدە جازعان.

كوەننىڭ ايتۋىنشا، ترامپ نەلسون ماندەلا مەن يسپاندىقتارعا قاتىستى ءناسىلشىل پىكىرلەر ايتقان.

كىتاپتا كوەن ءوزىن تۇرمەگە تۇسىرگەن "ءدال سول قىلمىستارعا كىنالى" ترامپ ەكەنىن ايتىپ  ايىپتايدى جانە بۇرىنعى باستىعىن "الدامشى، وتىرىكشى، الاياق، بۇزاقى، ءناسىلشىل، جىرتقىش، كونمان" دەپ اتايدى. ول ءوزىنىڭ دە بۇرىن "توبىرلىق باستىق" مەنتاليتەتىنە يە بولعانىن ايتتى.

اقش-تىڭ ءار ءتۇرلى اقپاراتتىق اگەنتتىكتەرى سەيسەنبىدە شىققان كىتاپتان ۇزىندىلەر جاريالادى. 

كوەن ءوزىنىڭ كىتابىندا ترامپ "ادەتتە، مۋزىكادان باستاپ مادەنيەتكە جانە ساياساتقا دەيىن قارا ناسىلدىلەر ءۇشىن ناشار پىكىرلەر ءبىلدىردى" دەپ جازدى.

ونىڭ سوزىنشە، ترامپ وڭتۇستىك افريكانىڭ بۇرىنعى پرەزيدەنتى جانە اپارتەيدكە قارسى بەلسەندى نەلسون ماندەلانى "كوشباسشى ەمەس" دەگەنىن ايتتى.

"ماعان قارا ءناسىلدى ادام باسقاراتىن ءبىر ەلدى ايتىڭىزشى. ءبارى دە دارەتحانا دەدى ترامپ مىرزا ءبىر كەزدەرى" دەپ جازعان كوەن.

"بۇل سوزدەر 2018 جىلدان باستاپ ترامپتىڭ افريكا ەلدەرىن "ءناجىس" دەپ اتاعانىنا ۇقساس ايىپتاۋلارمەن ۇندەس" دەيدى BBC.

دەگەنمەن، سول كەزدە اقش پرەزيدەنتى جۋرناليستەرگە "مەن ءناسىلشىل ەمەسپىن. سىزگە سۇحبات بەرگەن ەڭ  ءناسىلشىل ەمەس اداممىن" دەپ جاۋاپ بەرگەن.

BBC اقپاراتىنا سايكەس، ناسىلدىك ايىپتاۋلار ترامپتىڭ ءبىرىنشى پرەزيدەنتتىك مەرزىمىنە كەدەرگى كەلتىردى جانە رەسپۋبليكاشىل پرەزيدەنتتىڭ قاراشا ايىندا ءوزىنىڭ دەموكراتيالىق قارسىلاسى دجو بايدەنگە قارسى قايتا سايلاۋعا تۇسۋىنە بايلانىستى ماسەلە بولىپ قالا بەردى.

كوەن كىتاپتا ترامپتى وزىنەن بۇرىنعى باراك وباماعا "جەككورۋشىلىكپەن قارايدى" دەپ ايىپتايدى.

كوەننىڭ ايتۋىنشا، ترامپ بىردە "مەن ەشقاشان يسپاندىقتاردىڭ داۋىسىن جيناي المايمىن. قارا ناسىلدىلەر سياقتى ولار دا ترامپقا داۋىس بەرە المايتىن اقىماق. ولار مەنىڭ ادامدارىم ەمەس" دەگەن.

دونالد ترامپتىڭ بۇكىل پرەزيدەنتتىك كەزەڭىندە، اسىرەسە سايلاۋ ناۋقانى كەزىندە مەكسيكالىقتاردى بىرنەشە رەت ماسقارالاعاننان كەيىن، لاتىن امەريكالارى تۋرالى ونىڭ پىكىرلەرى  مۇقيات باقىلاۋدا بولدى.

2019 جىلى پرەزيدەنت ترامپ نيۋ-مەكسيكودا وتكەن ميتينگىدە "ەشكىم يسپاندىقتاردى بۇدان ارتىق جاقسى كورمەيدى" دەگەن.

اق ءۇي "كوەن وتىرىك ايتادى" دەيدى

"كوەن - بۇل كونگرەسسكە وتىرىك ايتقان ماسقارا قىلمىسكەر جانە قىزمەتىنەن بوساتىلعان ادۆوكات. ول ءوزىنىڭ بارلىق سەنىمدىلىگىن جوعالتتى جانە ونىڭ وتىرىكپەن پايدا تابۋعا دەگەن سوڭعى ارەكەتىن كورۋ تاڭقالارلىق ەمەس" دەدى اق ءۇيدىڭ باسپا ءسوز حاتشىسى كايلەي ماكەناني دەمالىس كۇندەرى جاساعان مالىمدەمەسىندە