ءبىرقاتار قىلمىستار ءۇشىن قاراستىرىلعان جازانى قاتاڭداتۋ اۋىر قىلمىستار كورسەتكىشىنىڭ 73%-عا وسۋىنە اسەر ەتتى. بۇل تۋرالى ورتالىق كوممۋنيكاسيالار قىزمەتى الاڭىندا باس پروكۋروردىڭ ورىنباسارى مارات احمەتجانوۆ مالىمدەدى. سونىمەن قاتار، ونىڭ اقپاراتى بويىنشا، ءقازىر سوتقا جىبەرىلەتىن مۇنداي ىستەردىڭ سانى 1،5 ەسەگە (11،2 مىڭنان 16،8 مىڭعا دەيىن) كوبەيدى. ناتيجەسىندە، قىلمىستىق ىستەردى قاراۋ ناتيجەلەرى بويىنشا قىلمىستىق ەلەمەنتتەردىڭ كوبى ناقتى جانە لايىقتى جازاسىن الۋدا.
باس پروكۋراتۋرانىڭ وكىلى مال ۇرلىعى ءۇشىن جازانى قاتاڭداتۋعا جەكە توقتالدى. مارات احمەتجانوۆتىڭ ايتۋىنشا، بۇل ماسەلە مەملەكەت باسشىسىنىڭ جەكە باقىلاۋىندا.
«حالىقتىڭ الەۋمەتتىك-ەكونوميكالىق جاعدايى ءۇشىن مالدىڭ زور ماڭىزىن، سونداي-اق ۇيىمداسقان قىلمىس قۇرامىنداعى مال ۇرلىعىنىڭ بۇرىن جيىلەپ كەتكەن فاكتىلەرىن ەسكەرە وتىرىپ، قىلمىستىق كودەكسكە «مال ۇرلاۋ» (188-1) جەكە بابى ەنگىزىلدى. بۇل ءوز ناتيجەسىن بەردى. بۇگىنگى تاڭدا مال ۇرلىعى 24%-عا (2868-دەن 2174-كە دەيىن) تومەندەدى»، - دەدى م.احمەتجانوۆ.
باس پروكۋروردىڭ ورىنباسارى اتاپ وتكەندەي، جازانىڭ اۋىرلىعى مەن تاتۋلاسۋعا تىيىم سالۋ مال ۇرلاۋعا ايتارلىقتاي توسقاۋىل بولدى
«ۇستىمىزدەگى جىلدىڭ مامىر ايىندا تۇركىستان وبلىسىندا مال ۇرلىعىمەن اينالىسقان قىلمىستىق توپ ۇستالدى. ولار 200-گە جۋىق ءىرى قارا مالىن ۇرلاپ، اۋىل تۇرعىندارىنا ميلليونداعان شىعىن كەلتىردى. 1 قىركۇيەكتە سوت مال ۇرلىعى تۋرالى جاڭا باپ بويىنشا بەس ادامدى 8 جىلعا باس بوستاندىعىنان ايىردى»، - دەپ مىسال كەلتىردى باس پروكۋراتۋرانىڭ وكىلى.
پىكىر قالدىرۋ